DUHA ka dagkong relihiyusong grupo nga nagdumala'g dagko nga eskwelahan sa nasud ang naghanyag kang Presidente Rody nga motabang sa pagpanday ug mas maayo pang Anti-Terrorism Law basta ibasura o i-veto niini ang kasamtangang bersyon nga gihain karon sa kongreso.
Kahibalo kita nga ang 18th Congress nagbutyag nga ilang dal-on sa Malacanang ang maong bersyon nga ilang napalusot sa tulo ka pagbasa niadtong niaging semana una sila nag-adjourn.
Gidawat sa kongreso ang bersyon sa senado nga Senate Bill No. 1083 human gisertipikahan sa presidente nga "urgent" o dinalian ang maong balaod.
Sa usa ka hiniusang pamahayag sa pito ka mga kadagkuan sa kongregasyon nga Brothers of the Christian School o gitawag nga De La Salle Brothers ug siyam nga kadagkuan sa kongregasyon sa Society of Jesus ilang gihingusgan ang pagbabag sa maong balaod.
Matud pa nila nga dili haom sa panahon ang maong balaod tungod kay nagkamamo pa kita sa dautang epekto sa coronavirus disease 2019 (Covid-19) diin daghan ang nangamatay ug nagpadayong nag-ilaid tungod sa pandemic.
Ingon pa sa ilang pamahayag nga "Ang atong sistema sa panglawas ug mga personahe niini na binat na'g maayo. Daghan sa atong mga katawhan ang nawad-an og trabaho ug gigutom.
Ang prayoridad karon mao ang pagpalig-on sa sistema sa panglawas, paghatag ug suporta sa mga health workers, pagseguro nga adunay pagkaon ang atong mga komunidad, pagpalagsik sa ekonomiya ug paghatag og trabaho sa katawhan.
Apan dugang pa nila nga ang "terror bill" nakapasamot lamang sa kaguol ug kalisang tungod kay aduna kini mga probisyon nga masaypan sa pagsabot ug posibleng maabuso sa mga anaa sa gahom ug tigpatuman niini.
Imbis nga makatabang kini sa pagprotekta sa katawhan, mahimo hinuon kining instrumento sa pagpanglupig kung mabutang sa dautang kamot.
Ingon pa nila nga kahibalo sila nga kinahanglan nga aduna kitay lig-on nga anti-terrorism law sa nasud, busa ang grupo naghanyag nga makig-alayon sa gobyerno aron matubag ang mga lehitimong kabalaka sa grupo nga nagdapig sa tawhanong katungod ug ordinaryong katawhan sa pagbatok sa terorismo.
Dugang nila nga "magtinabangay kita aron makapanday og mas maayo nga bersyon aron mahalungkat ang hinungdan sa terorismo ug matubag ang kabalaka sa katawhan sa ilang batakang katungod."
Sa maong lakang, nagkahiusa kita sa pag-atubang sa terorismo sa nasud. Dalaygon kining gibuhat sa mga relihiyusong grupo nga wala sila nagpakahilom lamang sa panghitabo sa palibot.
Sa niaging mga adlaw, ato sab nga nabasa ang pamahayag sa mga grupo sa abogado, ug mga "civil society organizations" sa ilang pagbabag sa maong balaudnon. Ang Obispo sa Manila naghatag na usab og pamahayag sa ilang baruganan nga dili pabor niini.
Busa magpakabana kita kay kung madayon man, dakong puruhan nga maabuso kini dili ni PRody kondili sa mga magpahamtang unya niini. Sa akong kabahin, mas maayo nga naa tay balaod kontra terorista kay hinay kaayo ang atong balaod aron kun ikumpara sa ubang nasud.
Apan dili kini dapat gamiton aron pag-abuso sa tawhanong katungod sa katawhan ug pagsumpo sa mga nibatikos sa hiwing gibuhat sa gobyerno.