KAY miingon man si Davao City Mayor Sara Duterte-Carpio nga dili lisud-lisuron sa mga checkpoint ang mga pagawas ug pasulod sa Davao City, daghan ang misuway og gawas ug sulod sa siyudad, kagahapon.
Apan gisugat kini og problema -- ang problema nagdasok, taas nga linya sa mga motorista kay lagi, ang otoridad mihimo gyud sa ilang papel sa pag-istrikto sa paghiling.
Sumala ni Mayor Sara, nga dili lisud-lisuron sa mga requirements labi na ang mga na-stranded nga taga Davao City nga gustong mouli sa Davao ug kung ania man sa siyudad nga gusto nang mouli sa ilang probinsya.
"Sa kadaghan og requirements sa locally stranded individuals, mas una pa makabyahe ang regular nga passengers. Sunda ninyo ang DILG kay ginasunod na sa ubang LGU nga naa i-require sa pagsulod sa mga tawo. Sa Davao City wala nata naga-require kay samot mo ma-stranded ana," ingon ni Mayor Sara atol sa regular nga programa niini sa 87.5 FM dcDR, Hunyo 5.
Apan, ang otoridad, mao gihapon, gipangitaan gihapon og mga papeles ang mga mosulod sa Davao City. Maayo man kini, gani kini ang husto, apan daw misobra ra sab. Wala pa seguro sila kadawat sa impormasyon sa mandu sa mayor.
Ang health screening, kana dili gyud na mawala, kinahanglan gyud na, pero ang pagpangita og mga daghan pa nga requirements sa mga pasahero, maoy dili na seguro angay.
Mga netizens nagbagulbol kay lagi abi nila og dili na hasol sa requirements ang mga checkpoint, susmaryosep, walay kausaban.
Nakabalo na ba kaha ang otoridad sa mandu ni Mayor Sara? Kung wala pa, angay silang mahibalo, aron mabati na sa tanan ang giingong new normal.