UNANG pasyente sa coronavirus disease (Covid-1) sa lungsod sa Madridejos namatay samtang laing duha kasamtangan nga gi-isolate.
Kini maoy gipahibawo ni Madridejos Mayor Salvador Dela Fuente sa Hunyo 8, 2020.
Gitino sa mayor nga ang tulo ka mga pasyente niadto pang Abril naa na sa Dakbayan sa Sugbo, wa sa lungsod.
Ang namatay nga 38 anyos nga lalake adunay pleural effusion o tubig sa baga dihang gi-admit sa Vicente Sotto Memorial Medical Center (VSMMC) niadtong tunga-tunga sa Abril.
Sa ospital na kini gi swab test ug nasuta nga nagpositibo sa Covid.
Nakabsan na sa kinabuhi ang pasyente sa unang semana sa Hunyo.
Ang ikaduha nga pasyente mao ang 49-anyos nga babaye nga taga Barangay Mancilang.
Bayaw siya sa unang pasyente nga maoy nagbantay kaniya sa hospital sa wa pa mamatay.
Ang ikatulo mao ang kapuyo sa unang pasyente ug kauban usab sa pagbantay sa hospital.
Dali nga mipahigayon og contact tracing ug pag disinfect ang lokal nga kagamhanan sa mga balay sa mga pasyente.
Ang ilang mga pamilya padayon nga gi monitor sa lungsod.
Gipahibaw ni Dela Fuente nga way angay nga ikabalaka ang mga konstituente tungod kay wa na makapauli ang tulo ka mga pasyente sukad niadtong Abril 14, 2020 dihang gidala sa Dakbayan sa Sugbo ang unang pasyente aron i-admit.
Nihangyo hinuon ang kagamhanan sa pagsubay sa estrikto nga protocol sa lalawigan sa Sugbo ug sa Department of Health aron di na mapun-an pa ang mga kaso sa lugar.
Sa kinatibuk-an, may upat na ka mga kaso nga natala ang lungsod sa Madridejos. (ANV)