KIDAPAWAN CITY -- Mitaas pa ang ihap sa mga sibilyan nga namakwit gumikan sa panagsangka sa mga armadong grupo nga nagsugod niadtong miaging adlaw sa probinsya sa Cotabato.
Gibutyag ni Cotabato Police Provincial Director Colonel Henry Villar nga mas misamot pa ang katag-katag nga engkwentro tali nila Kumander Ricky Hussien sa Moro Islamic Liberation Front (MILF) ug grupo ni Kumander Butoh Sanday sa Barangay Talitay, Pikit, North Cotabato.
Libuan na ka pamilya ang mihikling gikan sa Barangay Gligli, Rajamuda, Bulod, Bagoinged, Bulol ug Barangay Talitay sa Pikit.
Ang duha ka pundok dunay personal nga dumot sa ilang pamilya o rido sa yuta nga ilang giilugan.
Sa diha nga gipalagpot sa Bangsamoro Islamic Armed Forces (BIAF) si Kumander Butoh Sanday isip Brigade Commander ug G3 sa MILF mas mi-ulbo pa ang kaguliyang.
Unom na ang gikataho nga napatay sa magkaaway nga pundok ug daghanan ang naangol.
Ang mga bakwit ang temporaryo karong namuyo sa mga tulunghaan ug sa ilang mga paryente sa mga luwas nga dapit.
Naningkamot karon si Pikit Mayor Datu Sumulong Sultan nga maundang ang dumot sa magkaaway nga grupo uban ang tabang sa militar, kapulisan ug liderato sa MILF. (Edgar Fuerzas)