SUPERBALITA DAVAO

Piapi Market i-disinfect

IPAHIGAYON karong adlawa ang general cleaning ug disinfection sa Piapi Mini-Market sa Quezon Boulevard Davao City aron maseguro nga Covid-free.

Kini ang gibutyag ni Dr. Josephine Villafuerte, head sa City Health Office (CHO), sa pagpahigayon sa general cleaning karong adlawa.

"Tomorrow (karong adlawa), will be the general cleaning and disinfection of Piapi Market," ingon ni Dr. Villafuerte pinaagi sa text messages kagahapon.

Nakurat ang mga vendors sa Piapi Mini-Market dihang miabot ang taga CHO aron ipahibalo kanila nga karong adlawa, walay maninda kay magpahigayon og disinfection.

Sumala sa usa ka vendor nga kung dunay ipahigayon nga swab testing, mopa-test siya aron maseguro nga luwas ang iyang mga kustomer.

"Confident kaayo mi magpa-test para safe tang tanan nga naninda diri ug ma-safe ang atong mga kustomer," sulti ni Gerlyn (nagpatago sa bansagon).

Apan giingon ni Dr. Villafuerte nga wala pa'y koordinasyon kanila ang health department sa rehiyon ug bisan ang lokal nga kagamhanan ning siyudad aron matigayon ang testing.

"Wala pa nag-coordinate about that, nagahulat pa ta," sumpay ni Dr. Villafuerte.

Atol sa programa kagahapon ni Davao City Mayor Sara Duterte-Carpio sa 87.5 FM dcDR, giingon niini nga wala pa siya'y impormasyon kung mapahigayon ba ang testing sa Piapi Mini-Market, ginahulat pa sab niya ang rekomendasyon.

Kahinumdoman nga nabutang sa "very high risk areas" ang Barangay 22-C diin asa nahimutang ang maong palengke. Lakip sa listahan mao ang Barangay 23-C, Agdao Proper, Buhangin Proper, Bucana, Cabantian, Leon Garcia, Maa ug Barangay Talomo Proper.

Sa Barangay 22-C, namatay na ang usa ka inahan kinsa nagpositibo ug kompermado sa Covid-19 diin ang mga anak niini anaa na sa isolation facility sa Southern Philippines Medical Center (SPMC).

Nag-self quarantine na sab ug gina-monitor sa health department ang usa ka pamilya nga manindahay og isda sa Piapi, Mini-Market dihang ang anak niini nakahalubilo sa anak sa namatay.

Tungod niini, istrikto ang pagpatuman sa seguridad diin di pasudlon ang di taga barangay sa mga entry-points sa Barangay 25-C, Barangay 26-C, Barangay 21-C ug Barangay 31-C nga maoy mga barangay nga naa sa palibot sa Barangay 23-C ug sa Barangay 22-C.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph