USA ka mamaligyaay og peanut butter ug polvoron nga 34 anyos nga babaye ang labing ulahing nagpositibo sa coronavirus disease (Covid 19) sa Cagayan de Oro.
Si Dr. Bernard Rocha, Medical Specialist II sa Northern Mindanao Medical Center (NMMC), maoy nikumpirmar niini Hunyo 8, 2020 atol sa inadlaw nga press briefing sa City Hall.
Matud ni Rocha nga dead on arrival kini sa NMMC dihang gidala sa iyang mga sakop sa pamilya mga alas 10:20 sa gabii sa Hunyo 7, 2020.
Matud ni Rocha nga tulo ka adlaw sa wala pa kini gidala sa ospital mireklamo kini sa sakit sa tiyan, pagsuka, hilanat, ug paglisod ug ginhawa. Giingong wala usab kini sukad nagpakonsulta.
Final nga diagnosis niini human nakuhaan og sample ug na-test nga nakabsan kini sa kinabuhi gumikan nataptan sa Covid-19.
"The cause of death with this patient is acute respiratory failure secondary to Covid-19 infection," matud ni Rocha.
Sa iyang bahin ni Dr. Joselito Retuya, ang epedimiologist sa City Health Office, siya niingon nga 10 ka mga sakop sa pamilya niini ang ila na gi-contact trace karon panahona.
Dugang niini nga Mayo 31 ngadto Hunyo 7, aduna na kini gibati basi sa ilang nakuha nga inpormasyon. Sa kasamtangan, gihimo na nila ang contact tracing focus containment sa area kon diin gisirado na ang dalan sa Dabatian Street ning panahona.
Ang maong nagpositibo mao ang ikaunom nga kaso sa Barangay Carmen kon diin kini ang ikatulo nga nakabsan sa kinabuhi.
Una mao ang babaye sa Zayas Carmen, ikaduha kadtong Macanhan, Carmen ug kini ang ikatulo.
Sa mga posibleng nakahalubilo sa maong pasyente, mamahimong mo-contact sa CHO HEMS 0975-841-3299.
Sa 15 nga nagpositibo sa Covid-19 sa Cagayan de Oro, usa niini gikan sa Barangay Camaman an, 1 sa Barangay Lumbia, 1 sa Barangay Bulua nga namatay sa Davao ug 3 sa Barangay Carmen.
Upat ang nakarekober nga 1 gikan sa numbered Barangay, 3 gikan sa Pinikitan, Barangay Camaman-an.
Sa pagkakaron, adunay 3 sa Isolation unit nga gikan sa Barangay Carmen.
Aduna sab 2 nga kasamtangan giadmit nga anaa sa NMMC taga Barangay Lumbia ug Barangay Kauswagan.
Si Mayor Oscar Moreno nipaabot sa pahasubo sa pamilya sa bag-ong namatay nga nagpositibo.
Gihangyo niini ang katawhan nga kung kinsa ang nakadoul sa biktima motawag sa CHO-HEMS.
Wala gihapon kini nihunong sa paghatag pahimangno sa katawhan nga dili magkumpiyansa kon mogawas sa balay ug himoung bulohaton ang pagsul-ob og face mask, paghugas og kamot ug social distancing.