DUHA ka mga lalaki pulos nakabsan sa kinabuhi sa duha ka insidente sa pagpangluba nga nahitabo sa probinsya sa Bukidnon ug sa siyudad sa Cagayan de Oro.
Unang biktima mao si Randolf C. Bayoc, 19, nagtrabaho isip laborer, ug residente sa Zone-2, Lindaban, Manolo Fortich, Bukidnon.
Gitumbok nga suspetsado mao si Keyrel Tanto, 18, ulitawo, residente sa susamang dapit.
Sa inisyal nga imbestigasyon sa Manolo Fortich Police Station sa pagpanguna ni Police Major Noel Flores Cano, nasuta nga sa wala pa ang insidente, adunay panaglalis nga nahitabo sa duha nga nisangpot sa paglubaay.
Naigo sa iyang tiyan nga bahin ang biktima ug gidala sa San Miguel Provincial Hospital Annex sa maong dapit apan gideklarar kini nga dead on arrival.
Ang suspetsado gidetanar na sa Manolo Fortich Police Station karon panahona.
Samtang ikaduhang kaso sa pagpangluba nahitabo mga alas 6:48 sa gabii adlawng Dominggo sa Hayes St., Brgy 39, ning siyudad sa Cagayan De Oro.
Maoy naabtan sa kapulisan nga naligo sa iyang kaugalingon nga dugo si Jonas S. Basalo, 23, ulitawo, taga Carmen ning siyudad.
Giingong kainom lamang sa biktima ang suspetsado nga giilang si Boy A. Tamson, 41, minyo, usa ka trisikad driver dihang nagkalalis nga nisangpot sa pagpangluba.
Gisuwayan pa og dala sa balay tambalanan si Basalo apan dead on arrival nga gideklarar sa mga doktor.
Ang kapulisan sa Police Station 2 sa Cogon nagpahigayon na og hot pursuit operation aron madakpan ang suspetsado.