ANG Regional Anti-Cyber Crime Unit (Racu) sa Central Visayas mihimo na og cyber investigation labot sa mikatap nga fake accounts sa Facebook apan, ilang giangkon nga naglisod sa pagsusi kinsa ang nagpaluyo niini.
Gisugdan na sa Racu 7 ang ilang imbestigasyon labot sa pag-clone sa Facebook account nga nakabalaka sa publiko.
Mao kini ang gibutyag ni Police Lieutenant Colonel Artemio Ricabo, deputy chief sa Racu 7.
Mahimo ra nga i-report mismo ngadto sa Facebook kon dunay clone nga account aron nga ang Facebook na ang motangtang niini.
“So, ang atung gibuhat sa cyber crime unit karon ni conduct tag ongoing investigation regarding ani if possible ma-trace nato ang author nga nagbuhat aning mga fake account,” matod ni Ricabo.
Apan giangkon ni Ricabo nga ang ilang buhatan dili makasubay kinsa ang responsabli sa fake account diha sa social media.
Giawhag sa kapulisan ang publiko nga nakasinati sa pa-clone sa ilang Facebook account nga mo angop sa buhatan sa cyber crime unit aron katabangan nga mapapas kini diha sa social media.
“Usually man gud sa mga dummy account, lisud kaayo pag-trace kay ikaw mismo pwede man ka mobuhat account. Anybody can make an account of somebody mao nang lisud. Ang ato ani si Facebook maoy atong saligan og dunay mga duplicate account or facebook account sila ra gyud ang mo delete ana automatically,” sigun ni Ricabo.
Nagtuo si Ricabo nga dunay grupo nga nag mugna sa maong matang sa pag-clone sa Facebook account nga adunay tuyo sa pagguba sa imahen sa tag-iya niini.
Naukay ang mga Sugboanon nga dunay Facebook accounts nga susama sa ilang pangalan nga naa sa Facebook. (AYB)