DAKONG lalis human sa dispersal ug pagdakop sa walo ka mga nagprotesta didto sa University of the Philippine Cebu (UP Cebu) mao ang pagpundok sa mga opisyal sa barangay ug Cebu City Hall diha sa MCWD Social Hall. Matod pa sa unang mga anunsyo diha sa imbistasyon ug sa mga nasabtan sa mga empleyado sa MCWD kay post birthday party ni Mayor Edgardo Labella.
Diha ko unang nakabasa niini sa mga post ni Ryan Pios Mark sa Facebook kabahin sa imbistasyon. Dayon dunay kabahin sa kalihokan nga na-upload sa Twitter. Nasundan pa kini og usa ka artikulo sa Today’s Carolinian, ang opisyal nga publication sa mga tinun-an sa University of San Carlos (USC).
Sukwahi kini sa opisyal nga pamahayag ni Atty. Floro Casas, ang city administrator, nga ang nahitabo mao ang usa ka meeting. Mao gani ang papel ni Dr. Jaime Bernadas, ang regional director sa Department of Health), kay gikinahanglan i-briefing ang mga kapitan kabahin sa mga lagda karong nagsugod na ang general community quarantine (GCQ).
Alang kanako, di man isyu kon nag-birthday party ba o nagtigum ang mga opisyal sa syudad diha sa MCWD social hall.
UNSAY ISYU?
Ang isyu mao ang mass gathering ug ang social distancing. Ang nakakita sa mga hulagway mao na lang ang mo-judge kon unsa gyud. Nakaingon ko niini kay ang maong kalihokan nahitabo dungan-dungan sa dispersal ug pagdakop sa Cebu 8 diha sa UP Cebu.
Pito ra unta ang mga aktibista nga nasikop. Apan giapil sa kapulisan ang usa ka bystander nga igo lang nagkuhag hulagway. Nahimuot ko kay ang mga aktibista nagtuo nga pito lang gyud ang gidakop. Taud-taud pa silang nakaamgo nga duna diay usa ka bystander nga giapil sa pagkarga sa trak. Imbis ang slogan “aktibista, di terorista,” kini si Clement Corominas mahimong moingon “bystander, di aktibista.”
Kining nahitabo kang Clement naghulagway lang sa kakuyaw nga bisan og wa kay labot, apilon gyud ka.
KIHA
Karon, gisang-at na sa kapulisan ang ilang mga kaso batok sa walo. Wa nay labot ang kalapasan batok sa Bayanihan Heal as One Act nga nahuman na sab sa miaging Biyernes. Ang mga kaso lakip sa kalapasan og balaod nga mo-report og mga sakit? Ang ako lang kay nagsigig pamahayag si PRO 7 Police Director Albert Ignatius Ferro kabahin sa mass gathering karong panahon sa Covid-19. Kon seryuso gyud siya, nganong wa niya gi-imbestigar ang mass gathering sa MCWD Social Hall? Hmmm. (@anol_cebu sa Twitter)