MIANGKON. Niadtong Sabado nakadawat ko og mensahe sa FB messenger gikan sa Department of Trade and Industry (DTI), Cebu Provincial office, nangutana kon asa nga Robinson ang akong gireklamo nga wa morespeto ang gwardiya sa senior.
Ingon ana ka busy ang mga ahensya sa gobiyerno atol ning Covid-19 pandemic kay tungatunga pa man sa Mayo nga mireklamo ko. Kagahapon sa buntag gitawgan ko sa manager (di lang nako hinganlan) sa Robinson Talamban nga maoy nangayo og pasaylo sa di mao nga pagsabot sa ilang gwardiya sa executive order (EO) sa Cebu City mayor nga dili pagawason ang mga senior citizen atol sa kwarentinas, gawas kon mopalit og pagkaon ug tambal.
Ang pagsabot sa mga gwardiya sa Robinson Talamban tungod kay nag-ingon man and EO sa mayor nga di pagawason sa balay ang mga senior di makasulod og supermarket. Ang wa gilakip og basa sa mga gwardiya ang mao ang exception. Niadtong higayona wa na lang ko makiglalis sa mga gwardiya.
Niadto na lang ko sa uban nga supermarket. Ang management sa mga mall ug supermarket kinahanglan nga ilang ayuhon og pasabot sa mga gwardiya kining mga lagda labina karon nia ta sa Covid-19 pandemic ron di intawon ma paw kaming mga senior. Gani, naay uban nga supermarket og pasudlon man pero palinyahon intawon ang mga senior.
Ang mga tag-iya sa security agency kinahanglan nga ila usab nga pahimatngunan ang ilang mga gwardiya. Kay naay uban gwardiya nga kon unsay nabutang sa order mao ra sad ang ipatuman bisan og dunay exception.
Gani, agi og pagtahod sa mga senior citizen si DTI Secretary Ramon M. Lopez mipakanaog of Memorandum Circular No. 20-09 nga giulohan og “Pagpahalaga sa mga Senior Citizen” niadtong Marso 31, 2020 tungod sa Covid-19 pandemic nga mahatagan og igo nga pagtagad ang mga senior citizen kon mamalit sa supermarket sa ilang panginahanglanon.
Ang IATF Resolution gidasig ra man ang mga senior nga di mogawas sa balay gawas kon importante ang lakawon sama sa emergency ug mamalit sa pagkaon ug tambal. Gani, ang mga senior nga gidid-an sa maong resolution o EOs sa mga mayor ug gobernador kadto ra man mga edaran nga dunay gipamatyag o sakit. Naay daghan senior nga sama pa ka baskog sa 20 anyos.
Maayo intawon nga napatuman na sa DTI ang Memorandum Circular 20-09 sa mga supermarkets. Ang tinuoray lang kon wa ko moreklamo morag mao lang gihapon ang mahitabo ang mga senior nga lig-on pa apan di pasudlon sa supermarket kon pasudlon man gani palinyahon sa gawas. Salamat DTI.
Manghinaut ta nga di na mausab ang akong nasinati sa mga gwardiya sa Robinson supermarket ingon sa uban nga supermarket nga di mopasulod sa mga senior citizen nga mopalit og ilang panginahanglanon tungod di maayo ang pagsabut sa EO sa mayor. Di ba garbo man sa mga senior nga nagpakabana ang atong kagamhanan tungod aning Covid-19? Apan ang maong orden dunay exemption.