WALA pa’y kaseguroan kon mosalmot ba ang Cebu Casino Ethyl Alcohol Sharks inig balik sa aksyon sa Maharlika Pilipinas Basketball League (MPBL) sa sunod tuig.
Mao kini ang giklaro sa team manager sa Sharks nga si Rommel Asuncion sa pagpakighinabi ning mantalaan kagahapon.
Dili pa lang dugay, gianunsyo sa MPBL nga ilahang gikanselar ang 2020-21 season nga magsugod unta karong Hunyo 12, 2020 gumikan sa padayong hulga sa coronavirus disease 2019 (Covid-19).
Ang liga, nga gitukod ni Senator Manny Pacquiao, nakadesisyon nga mobalik karon nang Hunyo 12, 2021.
Gipasabot ni Asuncion nga bisan wala pa mianunsyo ang liga kabahin sa kanselasyon sa 2020 season, nag-file na sila og leave-of-absence.
Sa interbyu sa ABS-CBN, gipasabot ni MPBL Commissioner Kenneth Duremdes nga dili na kinahanglan ang pagpasa og leave-of-absence alang sa 2020 season gumikan kay nakanselar na kini.
Apan giklaro ni Duremdes nga inig balik sa aksyon sa liga sa sunod tuig, wala’y team nga tugtan nga mag-leave-of-absence.
Supak si Asuncion ning maong ideya.
“Mura’g unfair sab na sa teams. Sa among side, dili pa mi makaseguro kon makaapil ba mi next year, depende gyud kon maka-recover ang company ug ang among sponsors aning pandemic,” pasabot ni Asuncion.
“As of now, wala pa mi maghunahuna sa MPBL kay priority pa nato kining pandemic. Wait and see lang sa mi karon.”
Gipasabot ni Asuncion nga sayop ang pagtuo nga wala maglisod ang ilang kompanya gumikan sa kakusog sa halin sa alcohol ning panahuna.
“Mao lagi na’y pagtuo kay in demand kaayo ang alcohol karon. Pero wala sila kahibalo nga ning mahal ang tanang kinahanglan sa paghimo ani,” pasabot ni Asuncion.
“Nag-concentrate lang una ang company sa paghimo’g alcohol bisa’g mahal kay para man ni sa kaayuhan sa mga tawo.”
Sa laing bahin, matod ni Asuncion nga nahatag nila ang tanang suweldo sa ilang mga magduduwa ug coaching staff basi sa tagsatagsa ka kontrata niini.
“Wala gyud ta’y players karon nga under contract. If ever maka-decide ang team nga moduwa next year, mao gihapon nga players ang atong kuhaon,” pasabot ni Asuncion.
“Gidili pa man sab sa liga ang players’ movement.” (ESL)