MOABOT 847 na ka mga Sugboanon nga na stranded sa laing isla o lugar ang nakapahimulos sa Stranded Cebuanos Assistance Program (Scap) sa pangagamhanan sa lalawigan sa Sugbo.
Kini ang mga Sugboanon nga na stranded tungod kay naabtan sa pagpatuman ug lockdown o enhanced community quarantine sa mga lugar gumikan sa coronavirus disease (Covid-19) pandemic.
Sa kinatibuk-an, niabot na ug P2,379,000 ang na release sa lalawigan alang sa mga na stranded pinaagi sa Kwarta Padala ug ubang padala center.
Sa Abril 14, unang mipahibaw si Cebu Governor Gwendolyn Garcia labot sa maong programa.
Daghan ang mipakita ug interes niini pinaagi sa pagsumiter sa ilang mga kompleto nga detalye pinaagi sa giandam nga downloadable forms sa probinsya.
Apan aron masiguro, gipahigayon sa lalawigan ang pagsusi o verification sa mga nisumiter sa pangagamhanan.
Kini aron masiguro nga lehitimong Sugboanon nga na stranded gyud ang maong indibidwal.
Sa pagkakaron, nagpadayon pa ang pag pang apod-apod sa ayuda sa mga Sugboanon. (ANV)