UBOS sa Resolution No. 41 sa Inter-Agency Task Force for the Management of Emerging Infectious Diseases, gipaluagan na ang kuwarantina sa atong lalawigan sa Sugbo ngadto sa general community quarantine (GCQ).
Lakip sa dakbayan sa Sugbo, Cebu, Mandaue ug Lapu-Lapu.
Mibalik ang public utility vehicles (PUVs), pagpanarbaho ang mga mamumuo, ug mga negosyo kon matuman nila ang requirements nga gilagda sa gobyerno.
Mahimo na ang non-contact sports ug ubang ehersisyo gawas sa mga panimalay.
Duna gihapoy mga ginadili nga mga kalihukan sama sa mass gatherings ug pagpatuman sa curfew ordinance alang sa non-workers sugod alas diyes sa gabii hangtod alas singko sa kadlawon. Alang sa mga nagtinguha nga molabang sa mga silingan nga dakbayan ug lungsod, duna’y mga requirements nga angay sundon aron makalusot sa checkpoints.
Subay sa Executive Order No. 79 ni Mayor Edgardo Labella, gimando sa lokal nga kagamhanan sa Dakbayan sa Sugbo nga ipatuman ang mandatory Covid-19 testing sa persons deprived of liberty (PDL) ug children in conflict with the law (CICL) sa dili pa kini isulod sa mga detention facilities o buhi-an.
Ipatuman ang maong kamanduan sa Cebu City Jail ug Cebu City Operation Second Chance Center kon diin nahimutang ang mga CICL, ang mga bata nga gipasanginlan o nahukman nga nakabuhat og kalapasan ubos sa atong mga balaod.
Lahi ang pamaagi sa pagtratar sa maong mga akusado kon itandi sa mga tawo nga duna’y hamtong nga pangedaron subay sa Juvenile Justice and Welfare Act.
Inay nga isagol ang mga CICL sa ubang binilanggo, gimando sa maong balaod nga ibutang sila sa mga Bahay Pag-asa (BPA), youth care/detention homes, Regional Rehabilitation Centers for Youth (RRCY) ug uban pang mga pasilidad sa Department of Social Welfare and Development (DSWD).
Ang panguo sa DSWD, Rolando Joselito Bautista, nga mao say nangulo sa Juvenile Justice and Welfare Council (JJWC), mipakanaog og polisiya alang sa paggiya sa mga pasilidad nga nagtan-aw sa kaayuhan sa mga CICL ingon man ang mga children at risk (CAR) nunot sa pandemiya.
Gihimug-atan sa DSWD Secretary nga ang 'best interest and safety' sa mga bata maoy labing prioridad sa pagpatuman sa mga quarantine measures sulod sa mga pasilidad. Gimanduan sab ang mga nagdumala sa mga pasilidad nga muhimo og report sa kahimtang sa mga bata.
Kini ang sumada sa kamanduan gikan sa DSWD Secretary sa pagsiguro nga luwas ang mga CICL ug CAR karong Covid-19 pandemic:
1. Paglikay sa Covid-19.
Kon namatikdan ang bata dunay simtomas sa Covid-19 ug dunay travel history o close contact sa caregiver o paryente nga usa ka person under investigation (PUI), ipahibalo dayon kini sa Barangay Health Emergency Response Team. Ilahi ang maong bata ug ibutang kini sa usa ka 'well-ventilated room.' I-decontaminate ang mga lugar nga kanunay adtuan sa gisuspetsaan nga bata o child staff.
Gimando nga pasul-obon og face masks, paggamiton og sanitizers, ug pagsunod sa physical distancing ang mga bata kon gikinahanglan ang presensya ini sa husgado.
2. Paghatag og saktong impormasyon.
Responsibilidad sa mga tigdumala sa mga pasilidad nga hatagan og sakto ug klarong impormasyon ang mga bata kabahin sa Covid-19 sa pinulongan nga masabtan dayon nila. Mahimo nga ihatag ang mga information materials sa matag bata o ipapilit kini sa bulletin board sa dormitory.
3. Komunikasyon sa kabanay.
Tungod nga gilikayan nga matakdan ang mga bata sa Covid-19, ginadli ang aktwal nga pagbisita sa mga paryente sa mga pasilidad. Mahimo hinoon ang video conferencing, pagtawag gamit ang telepono o cellphone o uban pang mga online and telephone communication measures. Tungod kay limitado ang kahimanan sa ubang dormitory, angay nga i-schedule sa mga tigdumala ang adlaw ug oras kon diin mahimo nga makahinabi sa mga bata ang ilang pamilya.
4. Paghinlo sa mga pasilidad.
Aron magpabiling hinlo ang pinuy-anan sa mga bata, kinahanglan nga igo ang supply sa tubig, alcohol, sabon, sanitizer ug face mask sa mga pasilidad. Pahinumduman ang mga bata sa saktong paghunaw sa mga kamot ug pagsunod sa mga proper hygiene practices. Limpyuhan ang mga butang nga kanunay mahikapan sa kamot sama sa lamesa, light switch ug railing. Duna say himuon nga social distancing sa mga tulganan sa mga bata.
5. Paghusay sa mga kaso.
Inay nga magkitaay sa personal, mapadayon gihapon ang case assessment sa mga bag-ong CICL pinaagi sa video conferencing ug uban pang mga pamaagi sa komunikasyon. Mahimong mapadayon sa mga social workers ang rehabilitation activities sa mga bata apan kinahanglan nga dunay social distancing. Hatagan sab og mental ug psychosocial support ang mga bata nga mahimong nakasinati og stress ug anxiety tungod sa pandmiya.
Gipahinumduman sab ang mga tigdumala nga ang pagpasulod o pag-detain sa mga bata sa ilang mga pasilidad usa ka 'measure of last resort'. Kini nagpasabot nga kon mahimo nga ipatuman ang non-custodial community or family-based alternatives to detention,” dili lang usa isulod ang mga bata sa pasilidad aron malikayan ang pagdasok ug risgo nga matakdan sa Covid-19.
Mahimong mopadangat sa mga suliran o kaso sa pagpangabuso pinaagi sa clbphilscebu@gmail.com) o mag-message sa Facebook page, Children’s Legal Bureau m.me/ChildrensLegalBureauInc (Messenger)