SUPERBALITA DAVAO

Dura: Gidali-dali sa Kongreso

Ratsada

SAMTANG akong gisuwat kining atong column, giingon nga padulong na sa Malacanang ang enrolled copy sa Anti-Terrorism Bill.

Kini bisan pa man nga daghan ang nanawagan nga mga miyembro sa Kongreso sa ilang liderato nga di i-transmit ang balaodnon.

Ang Kongreso gilangkuban sa 302 ka mga miyembro. Aron maaprubahan ang usa ka mosyon sa pagpasa sa Anti-Terrorism Bill gikinahanglan ang mayorya nga boto.

Sa 168 nga miboto, 14 na ang mibakwi sa ilang boto, busa gikinahanglan pa nila ang 2 ka boto aron di gyud ma-transmit ang maong balaodnon.

Sanglit giingon nga urgent, gipaspasan sa Kongreso ang proseso pinaagi sa pagsagop sa bersyon sa Senado.

Ang mga nipabor nangatarungan nga nindot kini nga balaod ug walay angay kabalak-an ang mga buotan nga tawo, apan ang mahadlok niini kadtong mga dautang tawo.

Apan subay sa opinyon sa National Union of People's Lawyers (NUPL), ang balaodnon makapabalaka tungod sa mga mosunod:

Una, mahimong silotan, o makapahuyang o makapugong, sa legal nga gimbuhaton ug paggamit sa kagawasan sa pagsulti ug panag-uban, sa bisan unsang porma ug pinaagi sa bisan unsang plataporma, sa sulod o gawas sa nasod, tungod sa halapad kaayo ug dili klaro nga kahulugan kung unsa ang "terorismo" ug susamang butang, ug naglangkob bisan lamang sa "plano," "sugyot," o "pagdani."

Ikaduha, pasagdan ang pundok sa mga dili pinili nga opisyales, tanan tinudlo sa Pangulo ug walay bisan usa nga huwes, magbaton sa halos hingpit nga gahum nga tugotan ang pulis ug bisan ang militar nga dakpon nga walay mandamento (warrant) ang bisan kinsa nga "suspek" -- bisan pa og sayop, nasipyat, o tinuyo -- isip "terorista" ug bilangguon nga walay kaso sulod sa duha ka semana hangtod 24 ka adlaw.

Ikatulo, maghatag niining gamay'ng pundok sa mga opisyales nga dili sakop sa hudikatura, kadaghanan adunay kaagi sa pulis ug militar, ang halos hingpit nga gahum sa pagtudlo -- bisan pa man sayop, nasipyat, o tinuyo -- ang mga grupo isip "terorista."

Ikaupat, magtugot sa mas taas nga pagkabilanggo bisag walay masang-at nga kaso lampas sa gitugot sa batakang balaod nga pinakadugay nga panahon (tulo ka adlaw ug alang sa mga piling krimen sama sa rebelyon o pagsulong ug kung ang pribilehiyo sa writ of habeas corpus suspendido kung adunay Balaod Militar).

Ikalima, magtugot sa elektronikong pagpapaniid ug nagkadaiyang matang sa wiretapping sa bisan unsang kalihokan o pamaagi sa pagsulti nga mahimong dili gyud "terorista" sa tulo ka bulan.

Ug ikaunom, maghatag og permiso sa pagsulod sa mga datos sama sa personal nga impormasyon, rekord sa bangko, ug pribadong komunikasyon, ug ang "freezing" sa mga pribadong kabtangan.

Kung mapirmahan na kini, hinuon, nakaseguro ako nga dunay mokuwestiyon sa constitutionality niini sa Korte Suprema.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph