HAGONOY, Davao del Sur -- Nakahatag og kabalaka ug perwisyo sa mga molupyo sa Barangay Balutakay ang usa ka kolor blue nga bag human gidudahang aduna'y sud nga Improvised Explosive Device (IED) alas 10 sa gabii, Dominggo, Hunyo 7.
Nakurat na lamang si Helen Villacarta Villasor, tag-iya sa Helen General Merchandise sa lugar, human nadiskubre ang nabilin sa atubangan sa iyang tindahan mao nga nangayo og responde sa mga otoridad.
Daling miresponde ang mga sakop sa Hagonoy Municipal Police Station ug Provincial Explosive Ordnance Disposal Team (PEODT) gamit ang K9 unit aron makatabang sa imbestigasyon.
Gipabusikad sa PEODT ang maong bag pinaagi sa pagbutang og dyutay'ng eksplosibo aron masigurong luwas ang matag usa ug di makadamyos sa propedad.
Human sa pagbusikad, nasuta nga mga gamit sa pagpamanday ang sud sa maong bag ug dili IED.
Anaa na sa kustodiya sa kapolisan ang nakuhang mga gamit apan di pa masulti sa mga otoridad kung gituyo pagbilin o nahibilin ang maong bag ingon man ang motibo niini. (Orlando B. Dinoy)