DIGOS CITY -- Nanghinaot ang amahan ning dakbayan nga hingpit ng malimpyo ang lugar gikan sa makamatay nga coronavirus disease 2019 (Covid-19) human nakarekober na ang siyam ka mga tawong unang nag-positibo sa maong kagaw.
Giawhag ni Mayor Josef Cagas ang publiko nga padayong motuman sa mga polisiya ug magdoble amping pa luyo sa pagkaayo sa mga indibidwal nga natakbuyan sa delikadong kagaw ilabi pa nga wa pa'y bakuna alang sa Covid-19.
Gi-anunsyo sa City Health Office (CHO) nga wa na'y kumpirmadong biktima sa Covid-19 niadtong Lunes, human nga nanguna ang siyudad sa pinakadaghang kaso lukop probinsya sa Davao del Sur.
Sumala ni Dr. Ronald Jumilla, pamuno sa City Epidemiology and Surveillance Unit (Cesu), nga negatibo na ang resulta sa nahibiling walo sa siyam ka mga pasyente nga nataptan sa Covid-19 niadtong buwan sa Mayo.
Kahinumduman nga nakatala ang dakbayan sa pinakaunang kaso sa Covid-19 niadtong buwan sa Marso, diin usa ka 38 anyos nga lalaki ang unang nataptan sa pag-adto niini sa 6-cockfighting derby sa New Matina Gallera sa Davao City gikan Marso 13-16.
Nadiskubre nga nag-positibo ang walo nga mga medical frontliners niadtong buwan sa Mayo samtang ginahimo ang ilang trabaho sa Davao del Sur Provincial Hospital.
Kini ang hinungdan nganong gipailawom sa Rapid Diagnostic Test (RDT) ang tanan nilang kawani.
Gitataw ni Jumilla nga human sa duha ka sagunsong tests, nasuta nga negatibo na ang walo ka health workers.
Apan, padayong giabisohan sa lokal nga gobyerno ang publiko nga di gihapon mokumpyansa ug motuman gyud sa social distancing, pagsul-ob og face mask, sanitasyon sa lawas ug di mogawas sa panimalay kung wala'y mahinungdanong katuyuan o wala mag-trabaho.
Gidason sa CHO, nga ilaha gihapong gibantayan ang 64 ka mga suspek nga aduna'y pending nga resulta.
Mokabat sab sa 382 ka mga indibidwal ang gipailawom sa strict home quarantine ug 30 ka mga tawo ang anaa sa isolation unit sa siyudad. (Orlando B. Dinoy)