WALA na lamang gipa-priso sa bana ang iyang asawa ug ang kabit niini nga iya rang kompare ug kasosyo sa ilang mga binuhing manok pantari.
Kini human masakpan sa bana ang iyang asawa nga si Maribel (bansagon gitago), 36 anyos, nagpuyo sa Barangay Langub, Maa Talomo District, Davao City, nga mipatong sa iyang kompare nga pulos sila hubo sud sa payag sa lansaran sa mga sunoy.
Alas 7 sa buntag kagahapon, nagpa-blotter sa Talomo Police Station ang bana nga si Ricardo, 39 anyos, aron iyang gamiton ang blotter isip basihan sa pagpa-summon sa iyang kompare sa barangay.
Nasayran nga dako ang katingala ni Ricardo dihang mihinayhinay og bangon ug migawas ang iyang asawa, ug hinayhinay sab niyang giukoy.
Nahibulong si Ricardo nganong misulod sa payag ang asawa nga alas 11 na sa gabii, hinungdan nga iya kining gisundan ug gilili sa bangag.
Misiga ang mata ug daw gitabunan sa langit ug yuta si Ricardo dihang iyang nakita nga maayong patong sa iyang asawa nga hubo sa lawas sa iyang kompare nga hubo sab.
Sumala pa nga dili gusto si Ricardo og iskandalo ug basin mabandilyo sa ilang dapit ang nahitabo, hinungdan nga iya kining gituktok ug gipailis ang duruha.
Giingon nga sa kauwaw, gilayong midagan ang kompare ni Ricardo ug natigayon ang away mag-asawa.
Karong adlawa, mag-abot sila sa barangay ug gusto ni Ricardo nga dili na sila magsosyo sa mga binuhing manok, kay giingon nga nasosyo pod niini ang iyang asawa.