Lonzon: Pan-os nga resulta sa Covid-19 test

DILI angayang maalarma ang katawhan sa mga kaso sa Covid-19 sa siyudad sa Sugbo.

Basi sa akong nasayran, ang nanggawas nga resulta matag adlaw sa nahimong positibo ang karaan na kini nga kaso o bahaw na. Nauwahi lang sa pagpaggawas ang resulta.

Ingon ani unta ang pagpasabot sa mga hingtungdang ahensya ngadto sa katawhan.

Daghan man gud ang naalarma sa matag adlaw nga resulta nga dunay napositibo sa Covid-19. Kay dugay nang gihunong sa Cebu City Government ang rapid mass testing niadtong Mayo ning tuiga.

Sa ato pa, bahaw o pan-os kining nakuha nga mga swab samples ug ang resulta uwahi nga migawas.

Sa akong mahibaw, ang nahimong positibo dugay na nangaayo ug wala gani gipamati sa ilang lawas.

Gituyo nako ang paghimo og istorya aron paghatag og kalinaw sa hunahuna sa mga tawo nga nabalaka ug nag- panic.

Kay dunay Facebook users ug naay mga chat group nga alarming kuno ang kaso sa Covid-19 a Cebu City. Bakak na.

Pero ang kamandoan sa siyudad sa Sugbo, sama sa paggamit sa face mask ug social distancing atong himuon.

Ayaw og ka-panic. Pag- inom lang og vitamin C kaduha sa usa ka adlaw. Kalamansi juice ug turmeric o salabat, exercise ug importante ang tuob.

Boljoon milambo

Gitutokan nako ang lungsod sa Boljoon, di tungod sa iyang pagka-5th class municipality sa probinsya sa Sugbo.

Usa niini ang hinayhinay nga pagsaka sa kalamboan sa mga maayong karsada paingon sa kabukiran, merkado, fishport, kapanginabuhian sa mga pagpanguma, pagpanagat ug daghan pa.

Ang mga lider sa maong lungsod sukad pa ni kanhi mayor Wargong Derama nga giila sa katawhang kabus nga ilang kaduolan bisan sa financial nga problema.

Si Wargong nga pangmasa maoy nasunod ni Mayor Merlou Derama nga inahan karon sa lungsod.

Si Merlou, sama ni Wargong, maoy mangunay sa pagbisita sa katawhan sa 11 ka mga Barangay sa Boljoon aron pagtubag ug pagpaminaw sa ilang panginahanglan. (Email: efrenlonzon71@gmail.com / Text: 09235562777)