SI JAPANESE Ambassador Ambassador Haneda Koji nipirma ug nagbayloay og mga kodigo tali kang Foreign Affairs Secretary Teodoro Locsin Jr. aron paghimong pormal sa panagtambayayong alang sa P73-bilyones nga utang o utang nga gastuhon sa pagtukod sa Cebu-Mactan Bridge (4th bridge) ug Davao City Bypass Construction Project II.
Kining duha ka mga proyekto, nga gastuhan sa Japan, maoy motubag sa suliran sa pagkonektar ug kahuot sa trapiko nga giatubang sa metropolitan nga mga dapit sa Sugbo ug Davao.
Ang Cebu-Mactan Bridge, balor og 119 billion yen (mga balor og 56 bilyones pesos) gitumong aron pagpalambo sa mga karsada karon sa Sugbo ug maoy dan alang sa mas paspas nga paglihok sa katawhan, mga baligyaon ug serbisyo. Modugtong kini sa central Cebu ngadto sa Mactan Economic Zone diin nahimutang ang daghang mga industriya nga nang-export.
Enero 2020, ang National Economic and Development Authority Board niduso sa funding sa Cebu-Mactan Bridge pinaagi sa Official Development Assistance (ODA).
Ang Cebu-Mactan Bridge project naglambigit sa pagtukod sa 3.3-kilometro nga taytayan nga dunay elevated viaduct nga 3.385 kilometers, nga dunay duha ka lanes matag direksyon.
Lakip usab niini ang pagtukod sa 4.9-kilometer four-lane coastal road nga dunay 4.751-kilometer elevated viaduct. Ang Department of Public Works and Highways (DPWH) mao ang gitahasan sa pagpatuman niini.
Ang Phase 2 sa Davao City Bypass, sa pikas bahin, nagbalor og 35 billion yen (gibana-banang balor og 17 billion pesos), modugtong sa southern nga tumoy sa Davao tali sa center portion sa siyudad aron pagsulbad sa huot nga trapiko sa central Davao.
Ang duha ka mga proyekto tipik sa “Build Build Build” program sa kagamhanan sa Pilipinas.
Isip nag-unang mopalihok alang sa ekonomikanhong pagbangon ning panahon sa Covid-19, kining dagko nga mga proyektong imprastraktura gipaabot nga mopukaw sa patigayon, negusyo ug mga kahigayunan sa trabaho sa mga lalawigan ug motabang sa pagpakatag sa pagtubo sa ekonomiya sa tibuok nasod. (MVG uban sa PR)