ANDAM nga atubangon sa kapulisan sa siyudad sa Sugbo ang kaso nga ipasaka sa militanteng mga pundok human gipangdakop sa mga pulis ang walo ka mga aktibista niadtong Biyernes, Hunyo 5, 2020 sa campus sa University of the Philippines (UP) Cebu sa Barangay Lahug.
Ang walo gipasakaan og tulo ka mga kaso, nga naglakip sa paglapas sa protocol sa general community quarantine (GCQ).
Nakagawas na niadtong Lunes sa gabii, Hunyo 8 ang walo ka mga aktibista nga gipangdakop sa mga sakop sa Cebu City Police Office human sila pasakai og mga kaso nga kalapasan sa Section 13 sa Batas Pambansa 880 kun The Public Assembly Act of 1985, paglapas sa Section 9 sa Republic Act 11332 kun Law on Reporting of Communicable Diseases ug Article 151, paragraph 2 sa Revised Penal Code.
Si Executive Judge Jenelyn Forrosuelo, presiding judge sa Municipal Trial Court in Cities Branch 4 sa dakbayan sa Sugbo, wa morekomendar og pyansa sa walo ka mga sinumbong tungod kay ipaagi na kini sa summary procedure.
Matod sa tigpamaba sa militanteng mga pundok, King Perez, nga nagtinguha sila nga mopasaka og mga kaso batok sa mga pulis nga nagdakop sa walo ka raliyesta. Matod ni Police Colonel Cydric Earl Tamayo, officer-in-charge sa CCPO, nga ilang huwaton ang ipasaka nga kaso batok kanila tungod kay andam nila kining tubagon.
“We will wait for the cases nga ma-charge sa amo kon unsa man. Ato na lang na tubagon ma ano pud nato sila. Ang ilang katungod nga mag- counter charge is always naa man na. So, hulaton nato kon unsa man. Syempre atong tubagon pud sa papel,” matod ni Tamayo.
Gibarugan ni Tamayo nga way nalapas nga balaod ang kapulisan sa pagdakop sa walo ka mga raliyesta nga silang Joahanna Veloso, associate vice president sa National Union of Students of the Philippines; Bern Canedo, vice president sa UP Cebu Student Council; Dyan Gumabao sa Kabataan Partylist-Cebu; Jaime Paglinawan, chairperson sa Bayan-Central Visayas; Janry Ubal sa Food not Bombs-Cebu, Al Ingking, UP alumnus ug Clement Corominas.
“Atong tubagon kay different situation ta karon because may Covid ta. So, there are underlying policies nga dapat atong i-impose, kay sa unang panahon paghimo anang UP and DND (Department of National Defense) peace accord, wala may Covid. Pero karon, naa man tay balaod nga bag-o nga dapat i-implemtar sad sa pulis,” dugang ni Tamayo. (AYB)