UPAT ka tawo ang nasikop sa Lapu-Lapu City Police Office (LCPO) tungod kay namaligya og rapid diagnostic testing kit nga gipaagi sa online selling nga walay resita.
Matod ni LCPO Director Police Colonel Clarito Baja, mag-atubang og kasong kalapasan sa Republic Act RA 9711 ubos sa Food and Drug Authority (FDA) kon pagbaligya og testing kit bisan walay resita ang mopalit niini.
Ang mga dinakpan gi-ila nga sila si Rey Alfonso Trinidad, taga-Barangay Bankal, Lapu-Lapu; Richard Joey Ouano, taga-lungsod sa Consolacion, ug Bill Bercede ug Maricel Soon, pulos taga Mandaue, City
Matod ni Baja, ang upat gisikop human sa gipahigayong operasyon sa kapulisan niadtong Hunyo 8 human nga na-monitor sa kapulisan ang ilang pagpamaligya online sa testing kits.
Si Trinidad ang una nga nasikop ug gisunod ang tulo ka kauban human iyang gibutyag nga nagkuhaan ra usab siya ug supply gikan kanila.
Gawas sa kasong kalapasan sa RA 9711, mag-atubang usab ang mga dinakpan og kasong kalapasan sa FDA Circular 2020-016 nga dili mahimo ibaligya online ang mga testing kit.
Giklaro ni Baja wala man tuod magpaburot sa presyo ang mga dinakpan ug nangangkong otorisadong supplier, apan gidili gihapon ang ilang gibuhat kay ila kining gibaligya ngadto ni bisan kinsa.
Moabot sa 60 ka kahon sa testing kit ang nasakmit sa kapulisan gikan sa mga dinakpan nga gibana-banang mokantidad ug P960,000.
Adunay 20 ka testing kit ang sulod sa matag box.
Pahimangno niya sa publiko dili magpataka og palit og testing kit kung dili sa lehitimong mga pharmacy. (GCM)