NADUGANGAN ug duha ka mga positibong kaso sa coronavirus disease (Covid-19) ang listahan sa dakbayan sa Carcar sa Hunyo 10, 2020.
Usa ka cancer patient nga nakalas samtang usa ka anak sa frontliner ang mga positibong kaso sa syudad.
Ang unang kaso mao ang 57 anyos nga babaye nga taga Maximina Poblacion. Daan na kini nga may sakit nga colon cancer ug anemia secondary bleeding to colostomy.
Na admit pa sa Vicente Sotto Memorial Medical Center (VSMMC) ang pasyente sa Mayo 23 ug gibalhin sa pribadong hospital sa Hunyo 5 kon asa usab kini gikuhaan ug swab sample.
Apan sa Hunyo 7 nakabsan sa kinabuhi ang pasyente.
Ang ikaduha nga pasyente mao ang sais anyos nga batang lalaki nga taga Camella Homes, Barangay Can-asujan.
Siya mao ang kinamanghoran nga anak sa usa ka frontliner nga nag positibo usab sa Covid.
Hinuon negatibo ang resulta sa swab test sa mga kaubanan niini sa panimalay.
Nagsugod na ang pagsusi sa pangagamhanan sa mga nakahimamat sa mga pasyente.
Sa kinatibuk-an may tulo na ka mga kaso ang syudad.
Padayon nga hangyo sa lokal nga kagamhanan nga palig-unon ang panlawas pinaagi sa home remedies nga gipaila-ila sa lalawigan sa Sugbo.
Ingon man ang health protocols nga striktong tumanon aron mapugngan ang pagkatap sa kagaw sa syudad./ANV