DEKALIDAD nga basketball ug volleyball tournament maoy mosugat sa mga Sugboanon sa higayon nga molurang na kining pagpanghudlat sa coronavirus disease (Covid-19).
Kini maoy gibutyag sa beteranong sportsman/businessman Lorenzo “Chao” Sy sa dihang gikahinabi sa Superbalita-Cebu.
Matod ni Sy, kinsa mao usab ang vice chairman sa Cebu City Sports Commission (CCSC), nga ipadayon ang iyang plano kaniadto nga mao ang pag-imbita sa mga nag-unang collegiate teams sa Manila nga isangka batok sa top two teams sa Sugbo.
Iyang gitumbok mao ang Ateneo Blue Eagles ug La Salle Green Archers ug ingon man ang Southwestern University (SWU) Cobras ug University of the Visayas (UV) Green Lancers alang sa lima ka adlaw nga kompetisyon.
“Duna na koy gikontak didto sa Manila nga maoy mo-invite sa teams. Actually, apil siya sa promotions. Hopefully, inig wala nay Covid, magsugod dayon ta sa negotiations,” matod ni Sy.
Plano ni Sy nga anha sa University of San Carlos gym niya ipahigayon ang tournament ug sa ubos nga presyo sa ticket.
Wala isalikway ni Sy ang pag-imbitar og laing team sama sa University of the Philippines (UP) Fighting Maroons kon dili available ang Ateneo o kaha ang La Salle.
Ang SWU Cobras mao ang defending champion sa Cebu Schools Athletic Foundation, Inc (Cesafi) human nila mapakgang ang dominasyon sa UV Lancers.
Gawas sa basketball, tinguha usab ni Sy nga makapahigayon og volleyball tournament nga langkuban usab og mga teams sa kaulohan.
Target ni Sy ang St. Benilde, Ateneo, La Salle ug Cebu Selection.
“September or October maoy atong plano, kon mabalik na ta sa normal,” matod ni Sy. / JBM