AWAY sa managsuon nisangko sa maduguong hitabo dihang ang bana nga milaban sa iyang asawa gipusil patay sa iyang bayaw sa alas 6:40 sa Martes sa gabi sa Sitio Sto. Niño 2, Brgy. Lamac, lungsod sa Consolacion.
Karaan nang panagbangi sa duha ka mga pamilya ang hinungdan sa krimen.
Si Elvin Rosalem Comonsad, 45, minyo, trabahante sa Mactan Export Zone, namatay human nakaangkog daghang mga samad pinusilan sa kalawasan.
Nitahan sa kapulisan si Rene Dayday Cosmo, hingkod, minyo, construction worker.
Si Major Verniño Noserale, hepe sa Consolacion Police Station nga nahinabi sa Superbalita Cebu, nagkanayon nga ang asawa ni Comonsad ug igsuon niini nagkaaway sa wa pa ang krimen.
Matod ni Noserales, duna nay karaang panagbangi sa ilang pamilya ang nakapaulbo sa away sa magsuon.
Tungod sa grabe nga lalis sa managsuon, naglinabanay ang ilang magsig ka pamilya. Si Cosmo, kinsa nasuko kaayo, nibahad nga pa matyon niya ang pamilya sa iyang igsuon.
Tuod man, gisulong niya sila si Comonsad sud sa balay niini ug gidiretso og pusil hinungdan sa kamatayon ni Comonsod diha-diha.
Human sa krimen, nitahan si Cosmo. Matod ni Noserale, si Cosmo niangkon nga napuno na siya sa pagsige og panghilabot sa iyang igsuon ug bana sa ilang pagpuyo.
Gitug-an ni Cosmo nga dugay nang panahon nga gihilabtan ang iyang pamilya hinungdan nga wa na niya maantos, iyang napusilan ang iyang bayaw.
Si Noserale nibutyag nga kasong murder ang ilang ipasaka batok kang Cosmo. / GPL