Panag-ilog sa kustomer misangko sa pinatyanay

PANAG-ILOG sa kustomer ang nag-unang hinungdan sa pagdiunggabay sa duha ka manghiwaay og karne sa merkado publiko sa Ward 1, lungsod sa Minglanilla niadtong Martes sa hapon, Hunyo 9, 2020.

Usa ang patay ug usa naa sa kritikal nga kahimtang nga gidala sa tambalanan human sa hitabo nga nakapalisang sa mga mamalitay.

Si Master Sergeant Rangie Lopez, imbestigador sa Minglanilla Police Station, niila sa duha nga sila si Joebert Baruc, 33, ug iyang silingan nga si Kevin Balame, 33.

Ang duha puro taga sityo Bacay, Barangay Tulay, lungsod sa Minglanilla.

Matod ni Lopez nga sila si Baruc ug Balame duna nay daang panagbangi.

Usa ka Romeo, kinsa saksi sa hitabo, niingon nga usa ka kustomer didto na sa lamesa ni Baruc.

Si Baruc naghiwa na unta sa karne, apan ang kustomer nitabok sa lamesa ni Balame.

Dinhi nahitabo ang init nga panaglalis sa duha ug nisangko sa pagdinunggabay.

Si Baruc namatay diha-diha samtang si Balame kritikal nga gidala sa tambalanan.

Matod ni Lopez, dunay daghang mga samad dinunggaban ang duha, apan gituohan nga si Baruc naintimano pagkaigo.

Samtang si Police Major William Homoc, hepe sa kapulisan sa lungsod sa Minglanilla nga nahinabi sa Superbalita Cebu, niingon nga si Balame kanhi sakop sa Minglanilla Traffic Command (Mitcom) apan natanggal sa wa pa matinong rason.

Si Baruc nag-sideline nga maoy tighiwa og karneng baboy sa merkado susama kang Balame.

Ang kapulisan usab nakadawat og taho nga sila si Baruc ug Balame pulos hubog atol sa hitabo.