Sugdan sa di madugay ang implememtasyon sa bicycle lane sa dakbayan sa Sugbo.
Kini ang gipahibawo ni Mayor Edgardo Labella human naka-identify ang Sugbo Bike Lanes Board (SBLB) nga bag-o lang niyang giumol pinaagi sa Executive Order number 81 og inisyal nga mga rota nga agian sa mga biseklita.
Si Gerry Carillo maoy gitudlo ni Labella isip chairman hulip kaniya samtang vice chairman si Bise Mayor Michael Rama.
Mokumpleto sa mga miyembro silang Konsehal Raymond Garcia, Antonio Cuenco, Alma Fe Casimero, Kenneth Enriquez, Joel Reston, Edgar Tabacon, Wilfredo Pesquera Jr., Jay Garganera, Roberto Pangilinan, Ellen Maghanoy ug Alan Choachuy.
Ang SBLB maoy mo-designate sa Sugbo Bike Lanes, mohimo og mga polisiya alang sa implementasyon para sa City’s shares priority bike lanes program.
Mohimo usab sila og bike educational campaign program, mohimo sa gikinahanglang guidelines, apil ang pagparehistro, para sa epektibo nga implementasyon sa City Ordinance 2408 kun Sugbu Bike Lanes Ordinance.
Motabang usab sila sa paghimo sa City’s Transportation Master Plan ug mobuhat sa ubang lihok nga kinahanglanon para sa epektibo nga pagpatuman sa ordinansa.
Ang inisyal nga implementasyon magsukad sa V. Rama Avenue paingon sa B. Rodriguez Street, lahos sa General Maxilom Avenue paingon sa Serging Osmeña Street lahos sa Plaza Independencia.
Si Labella nagkanayon nga posible karong semanaha, mapatuman na nila ang bike lane sanglit ang tanang desisyon kinahanglan nga magagikan sa bicycle board, labi na ang pag-ila sa mga dalan nga butangan og lane.