NAGLUTAW ug wala nay kinabuhi nga nakaplagan ang 14 anyos nga tinun-an kagahapon mga alas 7:00 sa buntag sa dagat sa Cugman nga bahin ning siyudad sa Cagayan de Oro.

Giila ang biktima nga mao si Joshua Lingona, taga Julio Pacana-Licoan St., ning siyudad ug tinun-an sa Misamis Oriental General Comphrehensive High School (MOGCHS) sa second year.

Si PO1 Argel Advincula sa Police Station 10 (PS10) sa Cugman nibutyag sa Sun.Star Superbalita nga nangaligo og dagat si Lingona kuyog ang mga classmate niini diin adunay sab giselebrar niadtong tungora.

Mga alas 4:00 sa hapon niadtong Sabado nangaligo ang biktima ug giingong nanginom og ilimnong makahubog human naligo og dagat sa usa Aconia Beach sa maong dapit.

Apan mga alas 8:00 sa gabii nitaho sa kapolisan ang mga ginikanan sa biktima tungod kay wala kini makauli human gibutyag sab sa mga higala niini nga wala na kini makita dihang naligo og dagat.

Gideklarar nga missing si Lingona hinungdan nga gilusad sa Oro Rescue Team ang pagpangita niini.

Matud ni Advincula nga nananghid ang ilang anak nga mangaligo apan dili sa dagat ug sa swimming pool sa Bulua.

Gani gipadalhan pa kini sa ginikanan og balon sa pagpangaligo human miingon si Lingona nga kuyog ang ilang maestra sa pagpangaligo.

Pakyas ang mga ginikanan sa unang higayon nga gipangita kini apan kagahapon sa buntag nakaplagan ang biktima nga wala nay kinabuhi ug naglutaw sa dagat.

Ang kapolisan nagtuo nga nga hubog nga naligo ang biktima.