Naugdaw ang opisina sa mga konsehal sa dakbayan sa Mandaue nga nahimutang sa ikaduhang andana sa Mandaue City Hall alas 2 sa kaadlawon sa Huwebes, Hunyo 11, 2020.
Gawas sa opisina sa mga konsehal, nagkagusbat sab ang opisina ni Vice Mayor Glenn Bercede ug opisina sa Mandaue City Public Information Office tungod sa tubig nga gipasirit.
Matod ni SFO2 Edgar Vergara, imbestigador, nga base sa ilang inisyal nga imbestigasyon, nagsugod ang kayo sa walang bahin sa opisina sa Sangguniang Panlungsod (SP) diin adunay aircon.
Sa laing pakighinabi, matod ni Mandaue City Mayor Jonas Cortes, nga adunay aircon sa opisina nga way ibot-ibot tungod sa kataas sa outlet niini.
Apan, sa imbestigasyon ni Vergara, naka-off ang breaker sa opisina.
Nagpasabot nga pawong ang kuryente mao nga opisina. Dugang niya nga tan-awon sab nila ang CCTV sa Mandaue City Hall aron masuta kinsay uwahi nga migawas.
Tungod sab sa kadaghang mga papeles nga anaa sa maong opisina, daling nikuyanap ang sunog.
Adunay nakita nga mga disinfectant sa maong opisina ug sutaon sab nila ni Vergara kon usa ba sab kini sa nakapadako sa kayo.
Apan gipasabot ni Vergara nga di kini mao ang hinungdan sa maong sunog.
Gani gitna-aw pa nila ang posible nga mga hinungdan sama sa faulty wiring o arson.
KUHA OG SAMPLE
Nagkuha na sila og mga sample sa wiring ug abo aron maimbestigar sa ilang laboratory sa Manila.
Nikabat ngadto sa P300,000 ang danyos sa sunog.
Sa laing bahin, gihunong usa ang mga serbisyo sa Mandaue City tungod sa sunog ug gilimpyihan una kini ug ipaubos sab sa assessment ang mga opisina nga naugdaw.
Nisugyot si Cortes, nga ang opisina sa mga konsehal ibalhin lang una sa second floor sa Mandaue CIty public market.
Dugang niya nga mamahimo nga temporaryo nga mag-opisina si Vice Mayor Bercede sa session hall.
Kon aduna silay session, ipahunong lang una ang iyang serbisyo. Sa laing pakighinabi, si Frelyn Mabanag, secretary sa SP, naguol sa mga papeles nga anaa sa SP Office sama sa mga ordinansa nga naapil sa pagkaugdaw.
Apan giklaro ni Mabanag nga aduna silay back-up sa maong mga papeles. Nanghinaot lang sab siya nga wa naunsa ang mother computer sa dakbayan sa Mandaue tungod kay ang mga papeles nga anaa ngadto sukad pa niadtong 1969 hangtod karon.
Kon ugaling adunay mga files nga naugdaw, mamahimo ra nila kining ma-print og balik.
Mga minuto ang milabay human sa pakighinabi sa Superbalita Cebu ngadto ni Mabanag, mipahibawo ang iyang mga kawani nga wa maapil sa pagkaugdaw ang ilang opisina. /