DUHA ka bag-ong kaso sa Covid-19 ang nadugang sa lungsod sa Minglanilla sa Huwebes, Hunyo 11, 2020.
Kini mao ang 82-anyos nga lalaki, molupyo sa Barangay Lipata, Linao.
Nagpakonsulta ang pasyente sa usa ka pribadong ospital sa Dakbayan sa Naga sa Mayo 31, kini tungod sa hilanat.
Giabisohan ang pasyente nga i-admit sa ospital apan giingong walay available nga silid hinungdan nga nipauli na lang kini sa ilang balay.
Gikuhaan siya og swab sample tungod mipakita kini og simtomas sa influenza-like illness (ILI).
Kasamtangan nga nagpaalim sa ospital ang pasyente.
Samtang ang ikaduha mao ang 24-anyos nga lalaki nga molupyo sa Nacua Compound.
Matod sa Minglanilla Rural Health Unit nga asymptomatic ang pasyente apan gipaubos sa reverse transcription-polymerase chain reaction (RT-PCR) test sa Mayo 9 human nakahimamat kini sa unang pasyente sa compound nga usa usab ka cancer patient.
Negatibo ang unang resulta niini apan sa ikaduha nga swab test nigawas nga positibo ang resulta sa pagsulay.
Ang lungsod sa Minglanilla nakatala na og 56 ka mga positibong kaso sa covid. (ANV)