NADAKPAN sa hiniusang puwersa sa militar ug kapulisan ang tulo ka mga gikatahapang karnaper sa probinsiya sa Cotabato.

Kapulisan nag-ila sa mga suspetsado nga sila Alcaizar Lupino, Jeson Arnaiz ug Teng Parok.

Sa taho gikan sa Cotabato Police Provincial Office, alas 3:00 sa hapon, Sabado, milusad og entrapment operation ang mga sakop sa Criminal Investigation and Detection Group (CIDG-12) mga pulis ug sundalo.

Giukoy sa mga otoridad ang gitaguan sa tulo nga nahimutang sa utlanan sa munisipyo sa President Roxas ug Kabacan.

Wala na makaporma ang tulo ka mga karnaper, malampuson silang nasignit sa gihimong operasyon sa otoridad.

Nakuha sa safehouse sa mga suspek ang mga kinawat nga motorsiklo, duha ka kalibre .45 nga pistola, usa ka .38 rebolber, mga bala.

Gipamahayag ni Cotabato Police Provincial Director SSupt Norberto Batislaong nga organisado ang grupo sa mga suspek nga maoy nalambigit sa pagpangawat og motorsiklo sa Kidapawan City, Digos, North Cotabato, Maguindanao ug Davao Del Sur.

Gidugang ni Batislaong nga ilang imbestigahan pag-ayo si Teng Parok nga maoy nangulo sa grupo aron makakuha og dugang impormasyon kun asa nagtago-tago ang ilang kaubanan nga naglihok sa nagkadaiyang dapit sa Central Mindanao. (Edgardo Fuerzas)