ANGOL ang 27 kabuok human maligid ang usa ka bus sa Grand transport nga gikan sa dakbayan sa Davao duol sa Digos Bridge, Barangay Aplaya, siyudad sa Digos, Sabado sa hapon.
Si Chief Inspector Anthony Padua, City Police Director, nisulti sa Sun. Star Superbalita nga ang naaksidenteng bus may body number 5188 ug plate number 5188, gimaneho ni Renato Alcala, ug molupyo sa Barangay Tres de Mayo, Digos.
Ni Padua pa, padong unta sa siyudad sa Tacurong ang bus dihang kalit lamang kining naligid sa lugar.
Gitabang dayon ang mga pasaherong lulan sa mao nga bus padong sa Davao del Sur Provincial Hospital nga dali sab nga giatiman sa mga doktor.
Hinuon, giklaro sa mga otoridad nga wala'y kinabuhing nakalas sa hitabo, apan nahiagum lamang og mga ginagmay'ng pangos ug bun-og sa kalawasan ang mga pasahero.
Usa sa mga pasahero nga si Rosemarie Palma, kinsa nahinabi sa Superbalita, nagkanayon nga gikan siya sa dakbayan sa Surigao ug moadto unta sa Malasila, Makilala, North Cotabato kay giimbitar sa iyang trato.
Dala sab niini ang 2 anyos niyang anak nga nakaangkon sab og bun-og sa nawong.
"Kalit kaayo oy wa gyud mi kabantay abi gyud nako og maunsa nami kay nabaliktad man gyud ang posisyon sa bus," niya pa.
Sa hitsura pa lang daan sa bus di makatuo ang mga tawong nitan-aw sa nahitabo sanglit milagro kaayo nga puro bun-og lang ang nahiagoman sa mga pasahero.
Laing pasahero sab nga mihangyo nga di ibutyag iyang ngalan nagkanayon nga kusog kaayo ang padagan sa mao nga drayber sa paggikan pa lang niini sa siyudad sa Davao.
"Bisan unsa lagi nga sakyanan iyang overtekan, unya mao to pag-abot didto naay laing sakyanan nga nikalit sab og overtake murag iyang gilikayan unya kay lalom man diay to kaayo," niya.
Matod ni Padua, nipasalig ang kumpanya sa bus nga motabang sa mga galastuhon sa tambal ug bayrunon sa ospital sa mga naangol nga pasahero.
Gitun-an sab nila karon ang kasong iduso batok sa drayber.
Hugot nga nagpahimagno ang kapulisan nga mag-amping gyud ang mga drayber sa pagmaneho sa ilang mga sakyanan ilabi pa nga modagsa ang mga pasahero nga manguli karong semanaha sa matag probinsya aron didto saulugon ang Semana Santa. (Orlando B. Dinoy)