USA ka lalaki kalit lamang giluba sa iyang tiyan samtang naglingkod-lingkod kilid sa irigasyon duol sa Provincial Capitol.
Maayong pagkataroy sa stainless nga kutsilyo ngadto sa tiyan ni Guillermo Pequino, 50, mag-uuma ug molupyo sa Barangay Matti, siyudad sa Digos, mga alas 10 sa milabay'ng gabii.
Ang suspek giila ni SPO3 Esdraz Delos Santos, imbestigador sa Digos City Police Office (DCPO), nga si Antonio Nebres, 61, taga Purok 4 sa samang barangay.
Gihulagway ni Delos Santos nga samtang didto ang biktima kilid sa irigasyon nikalit pagduol ang suspek ug dayong hansak sa kutsilyo sa lawas sa biktima.
Apan, matod ni Delos Santos nga naalaan lang ang biktima sanglit ang tuyo sa suspek mao ang iyang gikabangi nga si alyas Gorio, kinsa naka-atraso kaniya.
Wa sab makalusot ang suspek ngadto sa kapulisan nga nagdali pagtubag sa alarma mao nga ilang gibitbit ug karon naghimas-himas na sa bugnawng rehas sa bilangguan.
Gisakmit sab ang kutsilyo nga gigamit sa krimen isip dugang ebidensiya sa kaso nga ipasaka.
Giduso na sa kapulisan ang kaso samtang nagpaalim pa ang biktima sa iyang samad dinunggaban didto sa Digos Cooperative Hospital. (Dondon Dinoy)