UBOS pa sa imbestigasyon sa kapolisan ang pagpangluthang patay sa kanhi sundalo niadtong Biyernes mga alas 8:00 sa gabii sa Barangay Bulua ning siyudad sa Cagayan de Oro.
Giila ang biktima nga mao si Edwin Quimidoy, lumad nga taga Barangay Pagatpat ning siyudad ug nanag-iya sa usa ka car wash sa Barangay Bulua.
Nakasaksi sa insidente ang empliyado niining si Ruel Tival ug gisaysay nga nanglimpyo pa ang biktima sa kilid nga bahin dihang misulod sa lugar ang wala mailang suspetsado.
Nakita pa nga miagbay ang suspetsado ngadto kang Quimidoy ug deretsong gipusil ang kilid nga bahin niini hinungdan sa ilang kakurat dihang nadungog ang kusog nga buto.
Yano lamang kaayong misibat ang suspetsado human nagbuy-od ang biktima sa dapit ug wala na kini masundan sa mga nakasaksi tungod sa kahadlok nga apil sa pusilon.
Giresponde sa Police Station 7 (PS7) sa Bulua ang insidente, apan nakasibat na ang suspek ug gani wala na namatikdan kung nibaklay lamang kini og nisakay human sa insidente.
Daghan ang nagtuong gidumtan ang biktima o adunay kini personal nga kaaway, apan ang kapolisan blanko pa sa maong mga pagtuo labina ila pa nga gihimo ang masusing imbestigasyon kalabot sa hitabo niadtong tungora.
Samtang sa dugang kalamboan kalabot sa insidente nahibaw-an nga adunay kini nakaaway nga miresulta sa pagpasakaay og kaso. Hinuon, padayon pa ang pagtino niini sa pagsulat ning balita.
Ang patayng lawas sa biktima anaa karon sa Divine Sheperd funeral homes sa Brgy. Bulua. (Stephanie V. Berganio)