USA ka amahan ang namatay human naaksidente ang ilang gisakyan nga motorsiklo sa alas 12:45 sa hapon niadtong Sabado.

Ang aksidente nahitabo didto sa Purok 3, Barangay Lacson, distrito sa Calinan, siyudad sa Davao nga miresulta sa kamatayon ni Sherwin Micaren, hamtong ang pangidaron, ug nagpuyo sa Waling-waling Street, Barangay Buhangin.

Base sa spot report sa Marilog Police Station, nagsakay ang biktima sa usa ka TMX 155 nga motorsiklo (plate number 8362-LI) ug gimaneho ni Nene Alcachupas, 18, minyo, nagpuyo sa Upper Tamugan, distrito sa Calinan.

Kauban sa biktima nga nagsakay sa maong motorsiklo mao ang iyang duha ka mga anak nga sila si Mariel, 2 ug Jet, 7.

Giingon nga gikan ang mga biktima sa Tamugan Proper apan dihang miabot sila sa Purok 3, Barangay Lacson naputol ang kadena sa motorsiklo mao nga natumba ug nalabay ang biktima.

Si Sherwin nakaangkon og grabeng samad sa ulo samtang ang iyang mga anak nakaangkon og mga bun-og sa kalawasan mao nga gidala sila didto sa Isaac Robillo Hospital.

Alas 4:30 sa hapon niadtong Sabado gideklara sa mga doktor nga namatay ang biktima samtang ang ubang mga biktima gibalhin didto sa Southern Philippines Medical Hospital (kanhi DMC).

Ang patay'ng lawas sa biktima atua gihaya sa St. Peter's Funeral Homes sa Calinan.

Sa laing bahin, duha ka mga tawo ang midangat sa tambalanan human sila gidunggab sa managlahing insidente kagahapon sa kaadlawon didto sa Barangay Panacan, siyudad sa Davao.

Midangat sa Southern Philippines Medical Center (SPMC) kanhi Davao Medical Center (DMC) mao sila Ferceval Sallave, 33, minyo, nagpuyo sa Davao Empress, Barangay Panacan ug Joy De Leon, 28, nagpuyo sa Land Mark, Barangay Panacan.

Base sa blotter sa Sasa Police Station, unang gidunggab sa ala 1:50 sa kaadlawon si De Leon didto sa Zone 4, Kilometro 13, Panacan.

Si De Leon giingon nga nag-inom sa maong lugar apan dihang mopauli na unta siya iyang gikalalis ang suspetsado nga si Melbert Relacion, taga Kilometro 12, Barangay Sasa.

Ang biktima nakaangkon og samad sa iyang likod ug liog dihang gihansakan og kutsilyo sa suspetsado.

Samtang si Sallave gidunggab sab sa alas 3:30 sa kaadlawon ni alyas Man Man, 16, nagpuyo sa Davao Empress.

Si Sallave giingon nga misuway lang pagbadlong sa mga batan-on nga gikalalis sa iyang bayaw apan giduol siya sa suspetsado dayon gidunggab sa tiyan ug kilid.

Human sa mitaop ang kutsilyo sa lawas sa biktima, ang suspetsado daling mibiya sa nahitaboan sa krimen mao

nga gipangita siya karon sa kapulisan.

Mga biktima giatiman na karon sa mga doktor sa tambalanan samtang giandam na ang kasong frustrated homicide batok sa mga suspetsado. (AD)