MOLUSAD og laing lihok protesta ang mga militanteng pundok sa dakbayan sa Sugbo nga pangunahan sa Bagong Alyansang Makabayan (Bayan) atol sa ika-122 nga anibersaryo sa Adlaw sa Kaugalingnan sa Pilipinas sumad karon, Biyernes, Hunyo 12.
Matod ni John Ruiz, coordinator sa Bayan Central Visayas (CV), aduna nay misanong nga mosalmot sa maong lihok-protesta nga himuon atubangan sa University of the Philippines (UP) Cebu sa Barangay Lahug, dakbayan sa Sugbo.
Kini bisan pa man sa hulga sa kapulisan ug sa Department of Interior and Local Government (DILG) nga dili pa mahimo tungod kay wala pa matapos nga Covid-19 pandemic sa tibuok kalibotan ug kuwarentina sa Sugbo.
Si Police Brigadier General Albert Ignatius Ferro, hepe sa Police Regional Office (PRO) 7, nibahad sa maong grupo nga ila gyud kini nga dakpon kung magmagahi sa hangyo sa pagpuhag sa panagtapok.
Matod niya nga anaa pa sa general community quarantine (GCQ) ang dakbayan sa Sugbo diin ang mga mass gathering hugot pa nga gidili sa pagkakaron.
“Since were are at the level of GCQ, mass gathering and mass protests are still not allowed. So ang ilang buhaton nila ugma (karon) is not allowed. We will be exercising maximum toleranace. If they dont dispersed, we will be forced to arrest them and file case against them,” matod ni Ferro.
Apan gikuwestyon sa militanteng pundok ang gipatuman sa kapulisan sa pagdili sa lihok-protesta human katungod sa nila ang pagprostesta aron batukan ang gipasar nga balaudnon kabahin sa pasanta sa terorismo.
Matod ni Ferro, ang buhaton sa mga cause-oriented groups nga labing maayo nga ilang usbon o i-repel ang Republic Act 11332 labot sa pag dili sa mass gathering panahon sa katalagman.
Gipasabot sa PRO-7 director nga wala nila pugngi ang pagpadayag sa ilang protesta tungod kay katungod usab nila kini apan ning panahon sa pandemic diin nagkataas pa ang kaso sa Covid 19 kinahanglan nga motuman sila niini.
“We are not preventing their freedom of expression. They could express it peacefully in their homes, maybe on virtual maybe or cyber. It’s up to them but, mass gathering is not allowed,” dugang ni Ferro.
Una na nga panagtapok sa pundok sa militanteng grupo duol sa UP Cebu ang gipuhag ug walo kanila ang gidakop sa miaging semanasa. / AYB