UBOS pa gihapon ang mga krimen sa siyudad sa Sugbo sukad giluagan na ang quarantine gikan sa enhanced community quarantine ngadto sa general community quarantine.
Gituohan nga ang padayon nga estriktong pagpatuman sa curfew panahon sa kagabhion maoy usa sa mga hinungdan.
Nagtuo unta ang kapulisan nga mosaka ang mga krimen sukad gipatuman ang GCQ sa Hunyo 1, 2020.
Matod sa officer in-charge sa Cebu City Police Office Police, Colonel Cydric Earl Tamayo, nga sa 12 ka adlaw nga nakalabay, ubos pa kaayo ang 8 focus crimes, sama sa theft, robbery, carnapping, rape ug uban pa.
Wa hinuon siya mohatag kon pila ang gidaghanon sa matag krimen.
Padayon ang pag monitor sa kapulisan sa dakbayan sa mga dapit nga kaniadto sa wa pa mokatap ang coronavirus disease taas og crime volume.
“So, crime statistics nato karon baba pa man. Wala pa siya gasaka with regards sa 8 focus crimes nato. Theft, robbery wala pa sa karon, wala pa,” matod ni Tamayo.
Gitinguha niya nga magpadayon ang kaubos sa crime volume sa tibuok Siyudad sa Sugbo nga maoy hinungdan nga giparobingan niya ang mga dapit sa siyudad panahon sa kagabhion.
Adunay 178 ka police personnel nga gikan sa Police Regional Office 7 nga gidugang sa CCPO diin sila ang mopatuman sa curfew hour sa kagabhion.
Abag kini sa mga pulis sa dakbayan tungod sa kadaghan sa personnel nga natakbuyan sa novel coronavirus ug adunay mga police station nga gipang lockdown.
“Actually our curfew teams coming from the regional headquarters katong gi ano nato, reserve force nato na siya. Gawas na siya sa mga police station members nato. Ano na sila eh 178 nga gi deploy namo sa sa una because I am the currently R1 man pud head of personnel. Naa koy gihatag nga 178 sa mga stations para lang mag conduct o mag implement og curfew and foot patrol kay naa man to mga estasyon nato sa una nga na lockdown. So, kinahanglan gihapon nga naay pulis sa dalan,” dugang ni Tamayo.
Lakip sa ilang gihingusdan sa pagkakaron ang ilang anti drug operation, apan nagmatngon na sila tungod sa kakuyaw nga matakdan sa Covid-19.
Mga durugista ang sagad nakatakod og Covid sa kapulisan sa Dakbayan sa Sugbo nga niresulta sa lockdown sa pipila ka mga police station./AYB