Sa nakalabay nga mga adlaw atong nasaksihan ang daghang kalapasan sa gipatuman nga protocol samtang nga nagpadayon ang gubat batok sa coronavirus. Nag-una mao ang klaro kaayo nga pagsupak sa balaod sa social ďistancing. Daghan ang nagpabadlong mao nga kutob nalang sa pagpanghupaw ang kadaghanan nga seryosong nagtamod niini.
Kay lagi ang virus mahimo man nga mapasa pasa ngadto sa laing tawo tungod sa pagmagahi sa uban pagtuman sa social distancing. Bisan ang pagsul-ob sa face mask nga di man unta ni bug-at buhaton.
Samot na ang pagpanghugas sa kamot. Way kabutangan ang mga kabalaka labot sa padayon nga pagsaka sa mga kaso sa Covid-19.
Busa kung padayon kitang magmagahi pagtuman sa atong tagsa tagsa ka obligasyon unsaon pagpakalma ning bangis natong kaaway, aw kita ra gihapon ang mag-antos.
Di man ni pinugsanay. Pero wa lay mahayay. Sa kanta pa ni Rommel Tuico, 'Di ka, di ko mamugos'. Mao ni unang linya sa iyang awit nga giulohan og Di Ko Mamugos.
Ang maong awit nga na-release sa hinapos nga bahin sa niaging tuig uma nakong nadunggan sa Facebook sa niaging semana. Nakabig ang akong pagtagad tungod sa kaseryuso sa lyrics.
Sa ulohan pa lang, Di ko mamugos maka hunahuna naka nga gahi ning tawhana. Samot na sa una ug ika duhang linya, “Di ka, di ko mamugos, bahala og forever kong mag-antos.”
Tiaw nimo na. Sa akong pagpakighinabi ni Rommel siya niingon nga wa may nagtukmod niya nga ingnon tang personal nga kasinatian aron tagikon ang mga linya sa maong awit.
Nisud ra gyud ni sa iyang hunahuna sa niaging tuig. Mao nga human masipra, si Rommel kauban sila si Stephen Diamante, drums; Jayd Yaun, bass; ug Jsoi Narciso, guitar, niarangkada sa kahanginan ang maong awit.
Si Rommel ang original vocalist sa banda nga Stagecrew lumad nga taga Barangay Tinubdan sa lungsod sa Daanbantayan. Dinhi na siya nagdako ug naminyo sa siuydad hangtod nga nisud sa kalibutan sa musika sa sayong bahin sa dekada 90.
Isip unang vocalist sa sikat nga bandang Stagecrew nadiin diin na sita og lingaw sa mga tawo. Gawas dinhi sa ato mga langyaw iyaha sab nga gilingaw sa dihang nakasakay siya sa cruise ship isip entertainer.
Pagpauli niya, wa magdugay nagimugso ang kanta nga gikalingawan sa tanan niadtong 2013. Ang awit nga giulohan og Dili Tanan. Kini maoy una niyang awit nga Binisaya.
Sa kataas sa among estorya, natapos ni sa isyu sa ayuda alang sa mga entertainer ning panahon sa pandemic. Nakabentaha og gamay ang drayber sa dyip kay bisan way biyahe may kahigayonan pa man nga maka-drive og lain.
Daghan na sab nila ang nakadawat og sinakong bugas. Pero ang mga entertainer sama niya, hangtod karon, wa pay naghisgot nga angayan gyud silang ayudahan kay serado man ang mga establismento nga maoy tinubdan sa ilang inadlaw-adlaw nga pamugas.