Binghay: Mangita na og trabaho

Human giluagluagan ang mga pamaagi sa Covid19 quarantine, naghinayhinay na sab og pangabri ang mga kompaniya, tindahan og mga tunghaan og panawat pagbalik sa ilang mga mamumuo. Ang ubang nangataktak, nanikaysikay na sab pagbalik pangita og kasudlan.

Sayod kita nga bisag wa pa ning pandemic, lisod ug subidahon na daan ang pagpangita og trabaho kay daghan ang mga mamumo nga nangita apan gamay ra ang kompaniya nga kasudlan labi na karon kay daghang nanira sa dayon o nanga-bankrupt. Halos ang tanan nagtakilid ang dagan kay nanga-apektuhan lakip ang atong nasudnong ekonomiya.

Ang akong lindog karon maghatag og mga tips kung unsaon pagpangita og trabaho bisag wa pa 100% malibkas ang kwatantina.

Una, ayaw sayangi ug usiki imong panahon sa mga way pulos nga kahihukan samtang nagpaabot kung anus-a malibkas ang kwarantina kay seguradong taastaas pa ang paabuton. Hinuon ang buhaton, maghimo og resume’ o bio data. Ang kadtong naa nay hinimo daan, i-update og ayuhon ug paninduton og samot aron malingian sa mobasa nga recruiter.

Motuo ka og sa dili, bisag imong posts sa social media makit-an kini sa mga Human Resource Officers (HROs) sa mga kompaniya. Pasabot nga limpyohi apil imong profile kay basig diri ra ka dapita masangit pag-presentar sa kaugalingon.

Sunod, hinay-hinay na og panikay-sikay pagpangita og kompaniya nga gusto nimong sudlan. Kasagarang mga recruitment officers nagtrabaho karon sa ilang balay (work from home) maong ilang interview maggamit ra og internet o telepono. Busa ayaw kalimot pagbutang sa insaktong contact numbers ug email address.

Ikatulo, tutuki pagpangita ang mga kompaniya nga way puas sa pagpang-recruit kay bisan og nagpandemic, kini sila wa kaayo tantong ma-igo og padayong nagserbisyo. Sila karon ang pinakadali nimong masudlan basta di lang mamili og mga de kampanilyang posisyon.

Ikaupat, bansaybansaya daan ang mga posibling ipangutana inig interview og imong labing maayong itubag.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph