Gihimo sa Cebu City Government nga venue ang Cebu Coliseum para adto na mokobra ang authorized representatives sa senior citizens sa ilang tag P3,000 financial assistance.
Kini human gitugotan ni Mayor Edgardo Labella ang representante sa qualified beneficiaries sanglit padayon gihapon nga epektibo ang stay at home order para sa senior citizens ning general community quarantine (GCQ).
Si Jeffrey Ocampo, executive director sa OSCA, niingon nga bisan kon nag-release sila para sa authorize representatives apan nagpadayon ang house to house distribution.
Matod ni Ocampo nga sa Cebu Coliseum bisan kon daghan pa ang mga tawo nga moadto nga mokubra, mapatuman ang physical social distancing ug dili mauwanan.
Mobalik og pagpanghatag ang City Treasurer’s Office sa Cebu Coliseum karong adlaw nga Lunes, Hunyo 15 aron pag-atiman sa authorize representatives sa senior citizens.
Sa distribution niadtong Huwebes ug Biyernes sa Cebu Coliseum, gihulagway ni Ocampo nga hapsay kini.
Giawhag ni Ocampo ang senior citizens nga di moadto sa City Hall o Cebu Coliseum sanglit mahimo silang manugo. / PAC