Gibalibaran sa konseho sa dakbayan sa Lapu-Lapu ang hangyo sa Cebu Korean Association nga tagaan sila og kaugalingong buhatan sud sa City Hall.
Ang asosasyon giingong nagpadala og suwat hangyo sa kagamhanan nga tagaan sila og espasyo sa ikaduhang andana sa City Hall. Apan kinahanglan una kining tagaan og pagtugot sa konseho sa dakbayan.
Apan matod ni Konsehal Rico Amores, vice chairman sa committee on tourism, gibalibaran kini sa konseho gumikan sa daghang rason.
Una, ang mga buhatan sa City Hall alang sa serbisyo panggamhanan sa mga Oponganon ug dili alang sa pribadong asosasyon.
Ikaduha, una na nga namahayag ang kagamhanan nga kuwang sila Og luna sa mga buhatan unya mohatag na hinuon sila Og buhatan sa usa ka asosasyon.
Ikatulo, kun ugaling ila pa nga giaprobahan ang hangyo posible nga mosunod usab og pangayo og luna alang sa ilang opisina ang ubang nationalities sa dakbayan sama sa Chinese, Hapon, German ug uban pa.
Pagpasabot ni Amores nga kung adunay concerns ang Cebu Korean Association sa ilang mga miyembro mahimo ra kining ipaagi sa Tourism Office sa dakbayan ug dili na kinahanglan nga aduna silay kaugalingong opisina.
Matod ni Amores nga human nga iyang gipasabot ang iyang kaubang sa konseho sa iyang rason nga, walay mikwestyon o nisupak.
Hinungdan nga ang chairman sa Committe on Tourism nga si Konsehal Quennie Malingin-Amman igo ra usab misunod sa nauyonan sa tanan sa konseho. / GCM