Protesta sud ra sa 30 segundos

Sa labing unang higayon sa kasaysayan sa mga lihok- protesta sa militanteng grupo sa dakbayan sa Sugbo, seguro ang labing mubo nga ilang kalihokan nga nilanat lang og 30 sigundos nahitabo sa dalan Colon kagahapon sa buntag, Hunyo 12.

Dali nga nanagan ang dili mominos pito ka sakop sa All UP Academic Employees Union human ilang nadungog ang wangwang sa patrol car sa Cebu City Police Office (CCPO).

Ang orihinal nga plano sa mga militanteng pundok adto sila magrali sa atubangan sa University of the Philippines (UP) Cebu sa Barangay Lahug apan tungod sa presensiya sa kapulisan ila kining gibalhin sa laing venue apan sa dinalian nga paagi.

Matod ni Regletto Imbong, presidente sa All UP Academic Employees Union, nga ilang gituyo ang pagmubo sa programa aron dili sila maabtan sa mga pulis ug masurprisa usab ang tropa sa gobiyerno tungod sa matod pa nila nga padayon nga pagpanghasi sa kapulisan sa ilang grupo.

Matod ni Embong, gipahibawo na silang daan sa buntag pa lang nga aduna nay mga pulis sa atbang sa UP campus nga maoy hinungdan nga wala na sila morisgo pa aron dili sila mahisama sa walo ka sakop sa militanteng pundok nga gidakop niadtong miaging semana.

“Amo to siyang gituyo sa disenyo namo nga i-catch ng atong kapulisan sa element of surprise. Intimidating nga reports (balita), pero despite that, ang atong mga progresibong grupo kauban ang movement against tyranny, ang All UP Academic Employees Union, wala mahadlok niini. So gidisenyo nato in such a way nga lightning ang porma sa atong protesta,” matod ni Imbong.

Sa pagsaulog sa ika-122 nga kasumaran sa Adlaw sa Kaugalingnan, matod ni Imbong, ang ilang tema niini mao ang “Bawiin ang kalayaan.”

Iyang gipasabot nga sa kasamtangang administrasyon gikuhaan na sa katungod ang katawhan.

Usa sa ilang hugot nga gisupak ang pagpasar sa balaudnon nga Anti-Terrorism Act of 2020 nga ilang gihulagway nga kontra sa demokrasya.

Si Police Colonel Cydric Earl Tamayo, officer-in-charge sa Cebu City Police Office (CCPO), nagkanayon nga dili nila intensiyon nga dakpon ang mga militanteng grupo nga molusad sa ilang lihok protesta.

Matod niya, kadto lang mosobra sa 10 ka mga tawo nga mohimo og mass gathering ang ilang dakpon apan hatagan pa kini og panahon nga makahunong sa ilang programa.

“(If) they are violating the social distancing (policy) ug ang pag-wear sa mask ug walay purpose nga nagtapok sila, ato silang papaulion,” matod ni Tamayo.

Gihulagway ni Tamayo nga malinawon ra ang kasaulogan sa Independence Day nga walay kasamok nga nahitabo.

Giklaro ni Tamayo nga wala did-i ang bisan kinsa nga grupo nga mopadayag sa ilang baruganan batok sa gobyerno apan ning panahon sa pandemic sa tibuok kalibutan dili lang una kini itugot sa kapulisan.

Nagpakita usab og suporta ang pro-administration sa dalan Colon alas 8:30 kagahapon sa buntag apan milanat lang kinig 8 minutos tungod sa pagtamod sa hangyo sa kapulisan nga dili sila angayan nga magdugay.

MANDAUE

Kon supak ang rali sa militanteng grupo sa dakbayan sa Sugbo, uyon ang nagrali sa dakbayan sa Mandaue sa Anti-Terrorism Bill.

Amg mga raliyesta nagpanon sa atubangan sa Mandaue City Hall aron pagpadayag sa ilang suporta naasoy nga balaudnon kagahapon, Hunyo 12.

Adunay walo ka mga raliyista ang nagdala sa ilang placard nga nagpakita sa ilang suporta sa Anti-Terrorism Bill.

Samtag dunay laing grupo nga anaa sa A. del Rosario St. sa Mandaue.

Si Sherwin Zaragosa, usa sa mga raliyista, niingon nga uyon siya sa balaod aron mahunong na ang mga hulga nga dala sa mga terorista ug aduna nay kalinaw ang kalibutan.

Si Joseph Kagang, estudyante nga niapil sa rali, niingon nga niapil aron pagpakita sa gobyerno nga anaay mga lumolupyo nga suporta sa maong balaod.

Gani, nasagmuyo na siya sa mga panghitabo sa pag-recruit sa mga estudyante aron mahimong mga terorista.

Sigon niya nga daghan ang niuyon sa maong balaod apan sila lang ang mipadangat sa ilang suporta.

Dugang niya nga kung ang kabataan ang pag-asa sa atong nasod, nganong ang mga sama niya nga estudyante nagpa-recruit sa mga terorista ug dunay nangamatay tungod sa engkwentro sa Armed Forces of the Philippines (AFP).

Nagsugod nag rally alas 9:30 sa buntag, anaa sab ang mga miyembro sa Mandaue City Police Office (MCPO) personnel nga naka-standby.

Si PLtCol. Franco Rudolph Oriol, ang head sa Police Traffic Group, niingon nga gitagaan lang nila og 15 minutos ang mga nagrali aron magpadayag sa ilang suporta sa Anti-Terrorism Bill.

Nakasabot si Oriol nga sa pagsaulog sa kasumaran sa Independence Day adunay gustong magpadayag sa ilang mga yangongo apan tungod sa giatubang nga krisis sa atong nasod ginadili ang pagtapok bisan paman kung naka-mask o social distancing.

Wala man makaabot ug 10 ang mga nag-rally apan nabalaka si Oriol kun mudaghan pa kini.

Kun ugaling mudaghan pa ang mga nagrally ug dili sila mutuman sa kasabotan nga 15 minutos, nag-andam na ang MCPO sa ilang Civil Disturbance Management (CDM) contingents.

Milapas ang 15 minutos ang mga nagrali, dauon nianam-anam na og panghipos sa placards ug namauli nga malinawon. / AYB, KFD

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph