Ang Philippine Atmospheric Geophysical and Astronomical Services Administration (Pagasa) opisyal nang nipahibawo sa ting-uwan sa nasod sa Hunyo 12, 2020.
Matod sa Pagasa nga ang mga unos, tropical depression (TD) Butchoy ug habagat sa nakalabay nga lima ka mga adlaw nagdala og daghang uwan sa western sections sa Luzon ug Visayas.
“Yes start na ting ulan. Criteria satisfied: for five-day period (of) rain, more than 25 millimeters amount of rainfall (has been) experienced at type 1 climate areas in the Philippines (field stations of Pagasa at west portion of the country and the existence of westerly component prevailing wind,” matod ni Al Quiblat, Pagasa-Mactan chief.
Ang mga uwan sundan usab og kainit (monsoon breaks) nga molanat og daghang mga adlaw hangtod sa duha ka mga semana.
Si Jhomer Eclarino, Pagasa Mactan weather specialist, niingon nga ang high heat index masinati sa monsoon breaks.
Matod niya nga ang heat index sa Hunyo sa miaging tuig naggagikan sa 37 ngadto sa 44 degrees Celsius.
“And this June 2020 so far ang pinakataas na HI is 41 degrees Celsius katong June 3,” siya niingon.
Sa mga alas 3 sa Biyernes sa hapon, ang TD Butchoy gibana-banang nahimutang mga 285 kilometros sa kasadpan sa Dagupan City, Pangasinan.
Katag nga mga uwan ug unos tungod sa Butchoy gipaabot nga moigo sa Luzon ug Visayas. / WBS