Natakdan sa coronavirus disease si Lapu-Lapu City Mayor Junard “Ahong” Chan gikan sa usa sa naglangkob sa iyang close-in security nga iyang kanunayng ika-uban sa iyang field work matag duaw niya sa mga barangay.
Gipahibawo ni Chan ang kondisyon sa iyang panglawas atol sa programa sa ika- 122nd Independence Day anniversary nga gipahigayon sa Liberty Shrine, Barangay Mactan, Biyernes sa buntag, Hunyo 12, 2020.
Wa siya motambong, iya lang gipaagi sa recorded video ang pagpadangat sa iyang mensahe nga gipahaom sa kalihokan.
“Kagabii lang niabot na ang resulta sa akong swab test ug subo nakong ipahibawo kaninyong tanan, nga nag-positibo kita sa Covid-19.
Usa ako ka asymptomatic patient, diin wala akoy gipamati nga sintomas sa maong sakit,” butyag ni Chan.
Matod niya nga taliwala sa iyang paningkamot nga di mataptan pinaagi sa pagsunod sa protocol, ilabi na ang pagsul-ob sa personal protective gear (PPE), nadutlan gihapon siya sa virus.
Asoy sa mayor sa dihang nahinabi sa Superbalita Cebu nga rason nga dali siya natakdan kay niubos ang iyang immune system gumikan sa iyang kakapoy base sa pagpasabot sa iyang doktor.
Kini ilabi na nga mangunay siya sa paghatod sa mga hinabang ngadto sa mga konstituwente, lakip na ang way pahuway nga moduaw niadtong mga residente nga naghangyo og pakitabang kaniya.
Tungod sa maong resulta, gipaubos sa swab test ang tanan niyang staff o kawani sa city hall nga iyang na-close contact ug gi-disinfect na sab ang Mayor’s office. Lakip nga gipaubos sa Covid test ang tanang mga sakop sa iyng pamilya ug ang kauban sa ilang balay.
Mapasalamaton ang mayor nga pulos nag-negatibo ang resulta sa ilang test.
Kasamtangan nga gi-quarantine si Chan sa usa sa mga lawak sa iyang balay nga nagsilbing guest room nga adunay lahi nga pultahan nga kaagian ug adunay kaugalingon pansayan.
“Pwera buyag, maayo ra ang akong lawas, himsog ang atong lawas. Lagsik ra ang akong pamati,” pahibawo sa mayor.
SERBISYO MAGPADAYON
Nipasalig si Chan nga bisan siya gi-isolate, di kini babag aron makapadayon siya sa iyang serbisyo ug padayon sa normal nga operasyon ang city hall ubos sa pagdumala ni Bise Mayor Celedonio Sitoy isip acting mayor.
Gimanduan niya ang iyang mga department head ug staff nga ipadayon ang naandan nga gimbuhaton, pagtubag sa mga suliran o yangongo sa matag Oponganon nga manawag sa City Hall hotline.
“Sa tinud-anay lang, wa gyud ko maanad nga mag-urong lang samtang daghan sa atong kaigsuonan ang nagpaabot nga atong maduaw ug matabangan,” sumala pa ni Chan.
Pinaagi sa teknolohiya, padayon ang iyang pakig-koordinasyon sa tanan niyang staff ug pagpadangat og anunsiyo nga ipaagi sa Zoom webinar, tawag sa mobile phone o gamit sa social media platform.
“Ako magpahinumdum sa makausa pa nga pabiling magmabinantayon kay ang virus is still very much around. Dili kita luwas niini, samtang wala pay vaccine,” mensahe sa opisyal.
NAGPOSITIBO
Nitala na ngadto sa 155 ka mga pasyente ang niguwa nga positibo sa Covid-19 sa Lapu-Lapu City, samtang 60 ang nanga-ayo ug adunay 10 ang namatay gumikan sa ilang existing nga kondisyon sa panglawas ug secondary to Covid-19.
Niadtong Hunyo 11, labing uwahi nga nadugang ang 17 ka mga pasyente nga milangkob sa 155 nga kinatibuk-ang gidaghanon.
Ang 17 ka mga indibidwal mga residente sa Seaside, Barangay Pusok (1); Lawis, Barangay Suba-basbas (1); Pacific Grande, SityoTimpoloc, Barangay Babag (2); Carajay, Barangay Gun-ob (1); Barangay Marigondon (1); Malinawon, Barangay Agus (2); Firing Range, Barangay Pusok (2); Yellowbell, Barangay Looc (2); New Lipata, Barangay Pusok (2); Proper, Barangy Bankal (1) ug Barangay Pajo (2). / FVQ