GIDAYEG sa beteranong sports journalist sa sikat nga US Channel ESPN ang halin sa pay-per-view sa away nila ni pound-for-pound champion Manny Pacquiao ug Joshua Clottey niadtong Marso 13 sa Dallas Cowboys Stadium.
Si Dan Rafael, kinsa dugay na kaayong writer sa ESPN, nagkanayon nga ang 700,000 PPV buys sa away nagpamatuod lang kon unsa ka dako ang kapabilidad ni Pacquiao sa paghakot og mga tawo.
Alang kang Rafael, nga si Pacquiao lang gyud ang rason kon nganong gihangop sa katawhan ang “The Event” boxing promotion.
“Make no mistake about it: Pacquiao — admittedly with an assist from an exotic venue, the absolutely incredible Cowboys Stadium, which was hosting a fight for the first time — is the reason the fight sold so well,” matod ni Rafael sa iyang blog sa ESPN.
Gibukbok ni Pacquiao sud sa 12 ka rounds si Clottey sa maong promosyon aron depensaan ang iyang World Boxing Organization (WBO) welterweight title. Nidugang si Rafael nga ang PPV buys ug ang 51,000 ka mga tawo nga personal nga ningsaksi sa away nagpakita nga kayang danihon ni Pacquiao dili lang ang mga mahiligon gyud kaayo sa boksing kon dili hasta ang mga ordinaryo lang nga sumosunod ning maong paugnat sa kusog.
Bilib gyud si Rafael sa kasikat ni Pacquiao kay bisan sud lang sa duha ka mga buwan nga gi-promote ang away unya wala pa gyu’y 24/7 HBO series, nakahakot gyud gihapon kini’g dagkong mga numero.
“For those of you who have said (and lots of you have) that the 700,000 pay-per-view buys and $35.3 million he generated for his March 13 fight against Joshua Clottey was a disappointment: You are insane,” batbat ni Rafael.