KARON nga daghan na ang nagka interest sa biseklita tungod sa coronavirus disease, daghan ang nangutana kon unsay tan-awon sa pagpalit og biseklita. Well, depende sa unsay imong ganahan nga biseklita.
Kon gusto ka nga maka biseklita unya gipit ka sa budget, adto sa surplus bike store. Ang usa sa akong ma recommend mao ang akong higala nga taga Barangay Tinago nga si Jay Garganera, tag-iya sa Js Corner. At least, limpyo na ang iyang mga biseklita, masakyan na diretso. Di sama sa kadaghanan nga tayaon pa. Paliti lang og interior aron mas sayon ang pagbomba kay ang barbola mahaum ra sa vulcanizing shops.
Kon ganahan ka og mountain bike, kini mas komplikado. Di ka makapatakag palit kay duna kini sizes, sama sa road bike nga mas nailhan sa ordinaryong tawo og “racer.”
Sa mountain bike, ang sagad sizes mao ang small, medium ug large. Kon ang imong height, 5’2 ngadto sa 5’6, haum nimo ang 15 o 16 inch frame size. Apan alang nako, ang 14.5 o extra small maayo sa mga 5’2 ngadto sa 5’5. Mas maanindot ang smaller nga size kay sa mas dako. Bati kaayo ko og experience sa akong 16.5 inch frame.
Kay 5’4 man ko, akong gipalit mao ang 14.5 inch frame size. Naa sab koy 15 inch but akong gihatag sa akong kamaguwangang anak.
IMPORTANTE
Kaniadto, nagtuo ko nga di mo matter ang size. But naamgumhan nako nga size does matter. Ngano? Sa akong 16.6 inch nga frame, ang akong tangkugo pirmeng sakit sa mga long ride. Medyo sakit sab ang akong mga bukton kay mas taas ang iyang top tube.
Mao na nga nahimuot ko sa usa ka seller og bike, dihang gisultihan sa akong higalang pulis nga mopalit siyag 15 inch frame size, giingnan siyang gamay ra kaayo na. Gipangutana siyang unsay iyaha, 26, 27.5 o 29. Lahi ra ang frame size ug wheel size. Wa sila magkaabot ug magkasinabot. Klaro nga kuwang sa alamag ang seller parte sa biseklita.
Sa di ka pa mopalit og mountain bike, pag research una og maayo. Ayaw pagpataka og palit aron di ka magmahay. Kon duna kay igong budget, ayaw pag-alang og palit. Kon mag Shimano ka, anha pagsugod og Deore aron di ka dayon mag upgrade. Masakit kag upgraditis kon mas ubos imoha ini.