DALI-A nakabasol sa kontra sa dili pa imbestigahon ni Mayor Edgar Labella. Mao kini ang nahitabo human linibo ka mga senior citizen ang nagpunsisok atubangan sa Cebu City Hall aron mokuha sa ilang financial assistance sa miaging semana.
Nganong wa na lang gihimong guideline nga ipadayon ang gihimong house-to-house distribution? Kon wa nay panahon ang staff sa OSCA alang sa maong kalihokan, nganong wala na lang gitugyan ngadto sa barangay?
Kon dili man gusto sa Cebu City Hall nga mahimong hero ang mga kaatbang sa politika diha sa barangay, nganong wala na lang gi-delegate sa MILO?
Kon magpailad kita sa atik nga kadtong mass gathering sa MCWD Social Hall sa miaging Hunyo 5 usa ka tigom kabahin sa buhaton kuyog kang Regional Director Jaime Bernadas sa Department of Health (DOH), kay dili gyud lagi post-birthday party, syaro wala mahisguti ang papel sa barangay sa distribution sa mga hinabang ug mga financial assistance?
Management function man kana. Syaro wala mo-eek ang OSCA? Syaro wa maapas daan ang maong problema nga magpunsisok diha sa Cebu City Hall ang mga senior citizen? Syaro walay nakabantay nga nagsugod na sa pag-adto sa city hall ang mga tiguwang?
Dihang niguwa na Facebook nga naghuot na ang mga senior, diha pa nakahunahuna ang atong pinanggang city administrator nga gisabotahe ang maong distribution.
Nitingog sab dayon si Mayor Labella nga iyang imbestigahon ang maong pagsabotahe.
Ang nisulod dayon sa akong hunahuna nga halos kada palpak sa Cebu City Hall, moanunsyo dayon og imbestigasyon sukad pa pagsugod sa termino. Apan wala pa sila makahunahuna og anunsyo og resulta sa maong imbestigasyon.
Tingale, unya na maghunahuna si Mayor Labella og resulta kon paninglan na inig 2022? Sa pagkakaron, maghayanghayang una?
Ang problema lang sa mayor ug iyang team palpak, lahi ang panahon sa Covid-19 krisis. Nag-expect ang katawhan og tarong ug paspas nga lihok. Makita baya dayon.
Ang kawalay social distancing ug ubang tarong nga pag-apod-apod sa hinabang ug mga quarantine pass niresulta sa grabing pagtakodtakod sa kabarangayan.
Samtang magsigi nag basa ang mga Sugboanon sa mga maayong programa sa ubang syudad sama sa mobile markets sa Pasig ug Valenzuela sa Metro Manila, nahitabo kadtong kaguliyang sa Carbon Market pag-Semana Santa. Duha pa ka semana human sa Mahal nga Adlaw, diha pa kita nagbuhat sa atong kaubalingong mobile markets.
Kining ingon niining mga palpak ang atong mahinumdoman sa achievements sa Cebu City team palpak. Mao nga nahimong number 1 sa kaso sa Covid-19 ang Syudad sa Sugbo.
(@anol_cebu sa Twitter)