DILI tugtan nga maka-operate pagbalik ang mga resort ug uban nga establisemento, labina niadtong nagtanyag og home stay, kon walay certificate of authority to operate (CAO) gikan sa Department of Tourism (DOT).
Moisyu og memorandum si Cebu Governor Gwendolyn Garcia sa kadagkoan sa mga local government unit nga magmando kanila nga pahibaw- on ang mga nanag-iya og resorts ug establishments nga gikinhanglan silang mosumiter sa importante nga mga dokumento aron maisyuhan og CAO.
“Kon kinsa to ang wala nanga-accredited kay duna man gud mo anay leverage ana kay kamo may moisyu ana, so mas maayo nga mahibawo gyud ang inyong office. Kinahanglan gyud na and we will only allow resorts that are duly accredited by DOT to reopen”, matod ni Garcia.
Usa sa gikinahanglan niini mao ang mayor's permit, aron ma isyuhan og accreditation sa DOT ang mga resort ug ubang mga establisimento nga may katulganan sa mga turista.
Kini maoy gi pahibaw ni Shalimar Tamano, pangu sa DOT 7 atol sa pulong sa Kapitolyo niadtong Martes, Hunyo 2, 2020.
Matod ni Tamano nga dili sila moisyu og CAO kon way permit ang resort o stay home establishments gikan sa mayor.
Usa kini sa guidelines sa Inter Agency Task Force (IATF) sa di pa tugtan nga makaabli ang mga establisemento nga nagtanyag og accomodation sa mga turista.
Giklaro ni Tamano nga bisan kon duna nay accreditation kaniadto ang resort, kinahanglan gihapon sila mo-apply og balik.
“At least, kon naay mahitabo, protected nana diri. Pag submit nimo sa CAO ug wala pa ma-accredit, okay ra na. Pero ang CAO importante kaayo to. I assure you that we will make it very fast and easy nga dili maglisod ang atong mga establishment”,matod ni Tamano.
Sa maong paagi ma-regulate ang mga establisimento nga nagtanyag og home stay.
“Kon nag operate, operate na siya og home stay diha, og walay siyay mayors permit, dili na siya pwede mo-operate. They will be in violation sa guidelines”, matod ni Garcia. Ang kadagkuan sa negusyo nabalaka sa lakat karon sa mga patigayon.
Mga 75 porsyento sa mga kawani sa industriya ug 65 porsyento sa business sector ang gipaabot nga mangatangtang sa trabaho kay daghan sa mga establisemento naglisod sa ilang kita, matod ni Mandaue Chamber of Commerce and Industry president Steven Yu. Pun-an pa nga ang mga tag-iya sa negusyo naglisod sa paghatag og transportasyon sa ilang mga kawani.