ANG dakbayan sa Cagayan de Oro ang pinakadaghan nga natalang ihap sa pagpangabuso sa mga kabataan ug mga kababayen-an sa tibuok Northern Mindanao (Rehiyon 10).
Anaa sa 105 ang natalang ihap sa pagpangabuso sa mga kababayen-an samtang 73 niini ang mga pagpangabuso sa mga kabataan sa tibuok rehiyon.
Gibutyag ni Police Lieutenant Colonel Mardy Hortillosa, tigpamaba sa Police Regional Office (PRO-10), nga mas daghan ang pagpangabuso nga natala ngadto sa mga kababayen-an.
“Ang kasagaraan gyud nato nga nabikitma is pagpangabuso sa babaye mas daghan sila kaysa mga bata , 73 sa child abuse ug kababayen-an ang na record sa atoa is 105,” matud ni Hortillosa.
Samtang sagad niini nga rason ilabi na nga karon panahon sa pagkwarantinas mao ang bana nga kanunay nga gakahubog ug kung ma-istoryahan sa asawa masuko ug mangdapat gyud dayon labaw na ang mga bana nga bayolente.
Gibutyag usab niini nga pagsugod sa kwarantinas posible nga wala pa naka-adjust ang mga magti-ayon nga kanunay nga mag-uban rason nga taas ang ihap nga niabot sa 39 sa bulan sa Marso, 37 sa bulan sa Abril ug Mayo 27 human nga giluagan na ang kwarantinas apan ubos gihapon kini kumpara sa nilabay nga tuig.
Ang dakbayan sa Cagayan de Oro usab ang duna’y pinakadaghang natalang kaso sa tibuok rehiyon.
“Sa entire region ang daghan gyud is sa babaye ang Cagayan de Oro gisundan dayon sa Bukidnon tapos gisundan dayon sa Iligan City. Sa mga bata the same Cagayan de Oro gisundan dayon sa Misamis Oriental then gisundan dayon sa Misamis Occidental,” dugang ni Hortillosa.
Sa Abril 18 hangtod Mayo 18 duna’y 36 nga kaso ang napasaka apan duna’y uban usab niini ang gi-atras ra usab . Sa Mayo 19 duna’y 29 ka kaso ug 19 ang napasaka niini samtang walo ang na-settle ra usab.
Samtang gibutyag ni Police Major Evan Viñas, tigpamaba sa Cagayan de Oro City Police Office (Cocpo), nga kini nga mga insidente ang gi-aksiyonan na usab sa kapulisan labi na sa Women and Children Protection Desk (WCPD) sa matag estasiyonan sa kapulisan.
Sukad sa Marso 17 hangtod na sa Hunyo 12,2020 anaa sa 56 ang natala sa violence against women, 22 sa violence against children, 14 sa rape case ug 1 sa human trafficking na nitala na sa 93.