MATOD ni Junjun Davide, andam siya nga mopirma og kasabutan aron mopatigbabaw ang kalinaw ug kahusay sa umaabot nga piniliay. isip kandidato pagka gobernador sa lalawigan sa Sugbo, ang maong pamahayag angayan nga suportahan sa tanan. Di lang sa pulong labaw sa tanan sa buhat.

Akong tinubdan sa kapulisan niingon nga wa gyu’y kapuslanan ang mga peace covenant nga gipirmahan sa mga kandidato kaniadto. Palpak ang maong kalihukan kay mibanaw man gihapon ang dugo. Daghang kinabuhi ang nakalas.

"The Manny Pacquiao Blog". Click here for stories and updates on the Filipino boxing champ.

Sa ato pa ang maong pinirmahay wa gyu’y epekto. Ug nagduda na hinuon ko nga publicity o gimik lang ang tanan. Tinud-anay ang tuyo sa kapulisan pagpapirma sa mga peace covenant, apan di seryoso ang mga namirma. Mao nga way naani nga maayo. Karon mitumaw na sab ang isyu mahitungod sa peace covenant nga pirmahan sa mga kandidato.

Manghinaot ta nga seryosohon kini kay nahadlok ko nga ang umaabot nga piniliay mas labaw nga init itandi sa nangaging eleksyon. Kung di kontrolahon sa mga kandidato ang ilang mga tawo mapaabot nato nga ang ilang mga supporters magka-engkwentro. Manghinaot ta nga kutob ra dinhi ug way dugong mobanaw tungod lang sa ilang paglaban sa mga kandidato.

Ang pangutana nako sa mga supporter: pakamatyan nimo ang imong kandidato?

IYAHAY

Dunay nangutana nako kong ma-kalahutay ba ang usa ka partido kong way suportang pinansyal ang pabahaon ning panahon sa kampanya. Simple lang ang tubag. Way partido nga makabarug kong sensiyo ray ilang saligan. Unsa ka tinuod nga dunay partido karon dinhi sa ato nga wa pa gyud maabti og grasya gikan sa ilang nasudnong buhatan. Minghoy ang nawong sa mga lokal nga kandidato.

Hinuon, ang uban wa na lang magtagad ini kay sa ilang pagtoo di na gyud moabot ang ilang gipaabot nga funding. Di man ni bag-o.

Kadaghan na ni mahitabo. Bisan niadtong mga partido nga gituhoang abunda sa salapi. Duna man tuod ipabaha apan di sab paigo. Dunay nagduda nga gikitngan ang funding og napunta sa laing bulsa.

Mao na ang kamatuoran sa politika. Di ka makasiguro nga way duwa nga mahitabo sud sa partido ilabi na kong funding ang hisgutan. Busa makapaabot kita nga mag-iyahay nalang ang uban.

Ang matag kandidato maningkamot na lang og salbar sa ilang kaugalingon.

Ang-ang man kong iyahang isakrapisyo ang iyang kaugalingong kuwarta para sa uban. Mao nay giingon nga iyahay og sikay sikay. Magdala man tuod sa ngalan s apartido, apan sa pangampanya iyahay sila og diskarte.

Kong ikaw ang kandidato, magsalig ka sa imong partido o maningkamot ka  bisan kong mag-inusara. Ang uban i-junk gani ang mga kauban basta makalusot lang.