Nurse gipapahawa sa kahadlok sa virus?

USA ka nurse gipapahawa sa iyang gipuy-an kay tag-iya nahadlok nga matakboyan sa Covid-19 hinungdan sa kasagmuyo niini.

Si Analizel Labra, 30, single mom nga taga Brgy. Lamesa, ug nurse sa Cebu Provincial Hospital sa lungsod sa Balamban.

Si Labra, mireklamo sa tag-iya sa boarding house nga si Victoria Ancos, senior citizen, taga Sitio Zegra, Brgy. Buanoy, lungsod sa Balamban.

Si Police Staff Sgt. Ronald Balimbing sa Balamban Police Station nga nahinabi sa Superbalita Cebu, nagkanayon nga ang biktima nagpa-blotter niadtong Sabado sa alas 8:00 sa buntag.

Sumala pa niini nga sayo sa buntag nanuktok sa ilang gipuy-an ang usa sa iyang silingan nga boarder nipahibalo nga ang tag-iya nga si Mrs. Ancos, gusto nga makig-estorya kaniya.

Apan nagkakonprontasi na hinuon sila kay gisukmatan nga nagdala lang siya og virus hinungdan sa iyang kaguol.

“Naa lagi day, dili nako pwedi mopauli diri kay suko na kaayo akong anak (tua sa Italy) maypa dauban nalang nang kwartoha,” sumala ni Police Staff Sgt. Balimbing nga miasoy sa gisulti sa biktima.

Si Labra, sa iyang text sa Superbalita Cebu, nagkanayon nga gisakitan siya sa pagbiaybiay kaniya sa tag-iya sa iyang gipuy-an.

Gipadayag niini nga mipasabot unta siya niini apan wa siya paminawa niini kay kon dili siya mopahawa mas maayo nga apil siya padauban uban ilang mga sapot.

Sumala niya nga ang anak sa tag-iya nga tua sa Italy maoy nakaingon nganong gusto sa tiguwang nga palayason sila.

Si Labra, mibutyag nga sakit kaayo alang kaniya kay sukad pagsugod sa lockdown wala siya makauli sa giabangan.

Tungod niini wala siya makapamahaw, nakatulog kay nangitag sakyanan nga makargahan sa iyang mga butang swerte kay gi-rescue siya sa ilang supervisor ug gikuha.

Gitug-an niini nga usa ka tuig na siya nga nag-abang, uban sa iyang igsuon.

“Okay raman ko Sir mopahawa dili lang gyud ko pakauwawan..Og ingnon nga maypag dauban nalang... Unsa man ko nagdalag virus kay tawo sab tawon ko Sir,” dugang ni Labra sa iyang text message sa Superbalita Cebu. kagahapon

Alang kaniya, isip usa ka frontliner, gibuhis sab niya ang iyang kinabuhi sama sa iyang ubang kauban sa trabaho ug dili lang i-discriminate.

Matod niini, naningkamot sab siya bisan sa kalisod ug sa kakuyaw sa ilang trabaho, iyang giantos isip single mom, aron dunay mapakaon sa iyang tulo ka anak.

Wa siyay plano nga dak-on kining maong isyu apan iyang gipa-blotter kay gusto niyang maleksyon ang tag-iya sa iyang giabangan.

Dugang nasayran sa Superbalita Cebu nga nangayo na og pasaylo ang tag-iya sa balay pinaagis a anak niini apan hinganli ning mantalaan human wala makuhai og ilang habig. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph